भांगरभूंय | प्रतिनिधी
आमदार डिलायला लोबो हांचें स्वताच्या सरकाराचेर बोट
भांगरभूंय । प्रतिनिधी
म्हापशें: गोंयांत सिगरेट ओडपाचें वेसन शाळेंतल्यान सुरू जाता आनी उपरांत तें वेसन घुंवळी वखदां घेवपा मेरेन पावता, अशें शिवोलीची आमदार तशेंच गोंय मनरिजवण संस्थेची उपाध्यक्ष डिलायला लोबो हांणी म्हणलां. सत्ताधारी आमदार डिलायला लोबो हांणी हें विधान करून स्वताच्या सरकारांतले शिक्षण वेवस्थेचेर बोट दवरलां. ताका लागून शाळेंत वेसना आड निर्बंध हाडपाक सरकार अपेशी थारला काय कितें असो प्रस्न उप्रासपाक लागला.
संवसारीक तंबाकू प्रतिबंधक दिसा निमतान गोंय मनरिजवण संस्थेन आनी गोंय दांत म्हाविद्यालयान सवो तंबाकू प्रतिबंध फिर्म फेस्टीवल घडोवन हाडिल्लो. ह्या महोत्सवाच्या इनामां भेटवण सुवाळ्यांत मुखेल सोयरी म्हूण डिलायला लोबो उलयताली.
डॉ. शेखर साळकार, गोंय दांत म्हाविद्यालयाची मुखेली डॉ. अमिता केंकरे कामत आनी हेर मानेस्त हाजीर आशिल्ले.
सिगरेटीचें वेसन शाळेंतल्यानूच सुरू जाता. तंबाकूच्या वेसनाचे भकीक पयलीं पडटात तीं शाळेचीं भुरगीं. आपलो इश्ट सिगरेट ओडटा हे खातीर आपूण लेगीत तें करचें अशें ताका दिसता. उपरांत हें वेसन सुरू जावन तें ल्हवू ल्हवू वाडत वता. ही सामकी गंभीर गजाल. भुरग्यां मदीं जागृताय करपा खातीर जीं फिल्मां ह्या महोत्सवांत वांटेकार जाल्लीं तीं आमी शाळांनी दाखयतले, अशें लोबो हांणी सांगलें.
डॉ. शेखर साळकार हांणी सांगलें, तंबाकू विकपी कंपनींचे बरे गिरायक म्हणल्यार शाळेचीं भुरगीं. आठवी, णववी आनी धावेंत शिकपी भुरग्यांनी तंबाकुची चव चाखल्या. तंबाकू इंडस्ट्री ही खूब बळिश्ट जाल्या. तातूंत खूब पयशांचो वेव्हार आशिल्ल्यान ताचें कोणूच वायट करपाक शकना, अशी खंत तांणी उक्तायली.
हेरॉयना फाटोफाट सिगरेट हें दुसरें बळिश्ट वेसन. फक्त 100 लोकां मदले फक्त 30 जाण हें वेसन सोडपांत येसस्वी जातात. हेर राज्यां परस गोंयांत सिगरेट ओडप्यांचें प्रमाण उणें आसा. हेर राज्यांनी 27 ते 30 टक्के आसा जाल्यार गोंयांत तें 10 टक्के आसा. ही टक्केवारी वाडची न्हय, हाची आमी जतनाय घेवपाक जाय, अशें डॉ. साळकार हांणी सांगलें. ई- सिगरेटीचें प्रमाण गोंयांत वाडपाक लागलां. सिगरेटी बदला ई- सिगरेट हो भलायके खातीर बरो पर्याय म्हूण ताचें मार्केटींग जाता. दिसपाक फेन्सी आशिल्ल्यान चल्यां परस चलयो चड प्रमाणांत ई- सिगरेट ओडटात, अशी म्हायती डॉ. साळकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
