भांगरभूंय | प्रतिनिधी
नवी दिल्ली, खबरां संस्था ः संरक्षण मंत्रालय भारतांतल्यान तयार केल्ल्या आनी निर्यात जावपी शस्त्रांची देखरेख वाडोवपाक लागलां. इकोनॉमिक टाइम्साच्या म्हणण्या प्रमाण संरक्षण मंत्रालयान खाजगी शस्त्रां तयार करप्यांक तांची शस्त्रां खंय पावतात हाचेर बारीक नदर दवरची अशी शिटकावणी दिल्या.
खरें म्हणल्यार भारतीय शस्त्रां चुकीच्या हातांत पावल्यांत असो दावो प्रसार माध्यमांनी केल्या उपरांत अशें करपाची गरज निर्माण जाल्या.
युरेशियन टाइम्साच्या अहवाला प्रमाण वर्साचे सुरवेक कांय माध्यमांनी भारतांत तयार केल्ल्या 155 एमएम आर्टिलरी शेल्सांचो युक्रेनांत वापर जाता असो दावो केल्लो.
संरक्षण मंत्रालयान शस्त्रां तयार करपी कंपनींक एंड यूजर सर्टिफिकेशन (EUC) नेमांक खरपणान पाळो दिवपाक सांगलां. हाका लागून भारतान निर्यात केल्लीं शस्त्रां निमाणी खंय पावतात हाची खात्री जातली.
शस्त्रां हांचे फुडें निर्यात जावची न्हय होच ह्या प्रमाणपत्राचो हेत आसा. सध्या युक्रेन, तुर्की, चीन आनी पाकिस्तानाक शस्त्रां विकपी भारतीय कंपनींचेर निर्बंध आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
