भांगरभूंय | प्रतिनिधी
फिल सॉल्ट (45) आनी मुखेली जोस बटलर (39) हांची उत्कृश्ट बॅटींग आनी बॉलरांच्या जबरदस्त प्रदर्शना नेटार येजमान इंग्लंडान पाकिस्तानाक निमाणे टी-20 मॅचींत 7 विकेटींनी हारयलो. ह्या जैता सयत चार मॅचींची माळ 2-0 फरकान जिखली. दोन मॅची पावसाक लागून रद्द करच्यो पडिल्ल्यो.
इंग्लंडाचो मुखेली जोस बटलरान टॉस जिखून पाकिस्तानाक पयलीं बॅटींग करपाचें आमंत्रण दिलें. मुखेली बाबर आजम आनी मोहम्मद रिझवान हांणी पाकिस्तानाक जलद सुरवात करून दिली. दोगांयनी पयले विकेटी खातीर 59 धांवड्यांची भागिदारी केली.
बाबरान 22 बॉलांनी 36 आनी रिझवानान 16 बॉलांनी 23 धांवड्यांची खेळी केली. ते उपरांत उस्मान ख्वाजान 38, इफ्तिखार अहमदान 21, नसीम शाहान 16 धांवड्यांचें योगदान दिलें. स बॅट्समनांक दोट्टी आंकडो लेगीत हुपपाक जमलो ना. पाकिस्तानाचो डाव 19.5 ओव्हरींनी 157 धांवड्यांचेर सोंपलो.
इंग्लंडा वतीन मार्क वूड, राशीद आनी लिव्हिंगस्टोन हांणी दरेकी 2 विकेटी घेतल्यो. जोफ्रा आर्चर, क्रिस जॉर्डन आनी मोईन अली हांणी एकेक विकेट मेळयली.
मोखीचो फाटलाव करपी इंग्लंडाक मुखेली जोस बटलर आनी फिल सॉल्ट आनीक आक्रमक सुरवात करून दिली. दोगांयनी फकत 6.2 ओव्हरींनी 82 धांवड्यांची भागिदारी केली. सॉल्टान 24 बॉलांनी 45, बटलरान 21 बॉलांनी 39 धांवड्यो केल्यो.
विल जॅक्सान 18 बॉलांनी 20 धांवड्यो केल्यो. जॉनी बॅयरस्टोनान नाबाद 28 आनी हॅरी ब्रुकान नाबाद 17 धांवड्यांचें योगदान दिलें. इंग्लंडान 15.3 ओव्हरींनी 158 धांवड्यो करून 7 विकेटींनी जैत जोडलें. पाकिस्ताना वतीन हॅरीस राऊफान तिनूय विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
