प्रज्ञानंदान आघाडी व्हगडायली

भांगरभूंय | प्रतिनिधी

नॉर्वे बुद्दीबळ सर्तींत भारतीय ग्रॅण्डमास्टर आर वैशाली आनी तिचो भाव आर प्रज्ञानंद हांचे खातीर संमिश्र दीस थारलो.

बायलांच्या गटांत वैशालीन स्विडनाचे पिया क्रॅमलींग हिका हारयली, जाल्यार दादल्यांच्या गटांत प्रज्ञानंदाक चवथे फेरयेंत अमेरिकेच्या हिकारू नाकामुरा कडल्यान हार घेवची पडली. हे हारी उपरांत प्रज्ञानंद 5.5 गुणां सयत चवथे सुवातेर घसरलो. विशेश म्हणल्यार दादल्यांच्या गटांतल्या सगल्या मॅचींचे निकाल लागले.

18 वर्सां पिरायेच्या प्रज्ञानंदान पांच खेपेचो संवसारीक वस्ताद मॅग्नस कार्लसनाक हारोवन गुणतकट्यांतली पयली सुवात मेळयिल्ली. पूण, दुसऱ्या दिसा संवसारीक क्रमवारींत तिसरे सुवातेर आशिल्ल्या हिकारू नाकामुरा कडल्यान हार घेवची पडली.

नाकामुरान खेळाचे सुरवातीकूच आघाडी घेतली. जाल्यार प्रज्ञानंदान अपरिहार्य दिवपी गजाली टाळपाचो खर यत्न केलो. पूण, अखेरेक ताचो बचाव अपेशी थारलो आनी ताणें 86 चाली उपरांत हार मानली. ज्या वेळार ताका समजलें की तो चेकमेट जालो, त्या वेळार ताणें तकलेक हात लायलो.

मजगतीं, दादल्यांच्या गटांतले दुसरे मॅचींत कार्लसनान आपलो कट्टर प्रतिस्पर्धी अमेरिकेच्या फॅबियानो कारुआनाक हारयलो. त्याच वेळार फिरौझा अलिरेझान सध्याचो संवसारीक वस्ताद चीनाच्या डिंग लिरेनाक हारयलो. चवथे फेरये उपरांत नाकामुरा स गुणां सयत पयले सुवातेर पावलो. तो अलिरेझा परस अर्द्या गुणान मुखार आसा. कार्लसन स गुणां सयत तिसरे सुवातेर आसा. कारुआना पांच गुणां सयत पांचवे आनी लिरेन 2.5 गुणां सयत निमाणे सुवातेर आसा.

वैशाली पयले सुवातेर कायम

आर वैशालीन दुसरें जैत जोडून पयली सुवात कायम राखली. तिणें स्विडनाची पिया क्रॅमलिंग हिका हारयली. ह्या जैतान तिका तीन गूण फावो जाले आनी 8.5 गुणां सयत ती पयले सुवातेर आसा.

वैशाली उपरांत बायलांच्या गटांतली संवसारीक वस्ताद चीनाची वेनजून झू आनी युक्रेनाची मुझीचूक जोड रितीन दुसरे सुवातेर आसात. मुझीचुकान भारताचे कोनेरू हम्पीक हारोवन तिसऱ्या जैताची नोंद केली. जाल्यार वेनजून हिणें आर्मागेडनांत तिच्याच देशाचे टिंगजी लेई हिका हारयली. लेई पांच गुणां सयत चवथे सुवातेर जाल्यार हम्पी आनी क्रॅमलिंग हांचे दरेकी 3 गूण आसात.