भांगरभूंय | प्रतिनिधी
गायत्री गोपिचंद आनी त्रिशा जॉली हे भारताचे जोडयेन सिंगापूर ओपन बॅडमिंटन सर्तीचे सेमी फायनलींत सुवात मेळयली. तांणी क्वॉर्टरफायनलींत संवसारीक क्रमवारींत सवे सुवातेर आशिल्ले दक्षीण कोरियाचे किम येओंग आनी कोंग यंग हे जोडयेक 21-18, 21-9 आनी 24-22 अशा तीन गेमींनी हारयली.
ह्या जैता सयत गायत्री-त्रिशा हे जोडयेन अंदूंच्या हंगामांत पयले खेपे सेमी फायनलींत सुवात मेळयली. तांणी पोरूं इंग्लंड ओपनाचे सेमी फायनलींत सुवात मेळयिल्ली.
मॅच उमळशीक वाडोवपी थारली. पयले गेमींत सुरवातीच्या चार गुणां उपरांत भारताची जोडी फाटीं पडली. कोरियाचे किम आनी कोंग हांणी तीन गुणांची आघाडी घेत ती कायम राखली. ह्या काळात भारताचे जोडयेन साबार चुकी केल्यो आनी ताका लागून प्रतिस्पर्धी जोडयेन मेळयिल्ली आघाडी भरून काडपाची तांकां संद मेळूंक ना. दक्षीण कोरियाचे जोडयेन पयली गेम 21-18 फरकान जिखली.
दुसरे गेमींत गायत्री-त्रिशा हांणी वेगळी रणनिती आपणायली. पूण, 7-3 अशी आघाडी घेतल्या उपरांत तांणी सेगीत पांच गूण व्हगडायले. पुर्वार्धा उपरांत कोरियाचे जोडयेन भारताचे जोडयेचेर चेपण हाडलें. पूण, हे खेपे भारताचे जोडयेन जबरदस्त रितीन पुनरागमन करीत दुसरी गेम 21-19 फरकान जिखून मॅचींत 1-1 अशी बरोबरी सादली.
तिसरे गेमींत जबरदस्त चुरस पळोवपाक मेळ्ळी. दोगांयनी आघाडी 3 गुणां परस चड वाडपाक दिली ना. दोन मॅच पॉयण्ट व्हगडायल्या उपरांत गायत्री आनी त्रिशा हांणी 24-22 फरकान जिखून फुडले फेरयेंत सुवात मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
