भांगरभूंय | प्रतिनिधी
मिरामार मुंगरलो ट्रॉलर; अंदूंचो मोसम सुको गेल्ल्याची नुस्तेमारांक खंत
भांगरभूंय । प्रतिनिधी
पणजीः आयच्यान खोल दर्यांत नुस्तेमारी करपाक बंदी घातल्या. सगळ्यो बाटी आतां धडेर वयर काडल्यात. हे मजगतीं एक ट्रॉलर मिरामार दर्यादेगेर एक ट्रॉलर शुक्रारा फांतोडेर 4 वरांच्या सुमाराक मुंगरलो.
नुस्तेमारी बंदी काळांत दर्यांत नुस्तेमारी करपी बोटींचेर खर पाळत दवरतले. बंदी मोडली जाल्यार तांकां खर दंड दितले, अशें नुस्तेमार खात्यान सांगलां. जाल्यार अंदूंचो नुस्तेमारीचो मोसम सामकोच सुको गेलो, अशी खंत नुस्तेकारांनी उक्तायली तशेंच फुडलो मोसम बरो वतलो, अशी आस्त बाळगिल्या.
1 जून ते 31 जुलय हे दोन म्हयने खोल दर्यांत नुस्तेमारीचेर बंदी आसतली. गे विशींची अधिसुचोवणी आमी काडल्या आनी ताची अंमलबजावणी खरसाणीन जावची हे खातीर मामलेदार, जिल्होधिकारी, कोस्ट गार्ड आनी मरीम पुलिशेक आमी कळयलां, अशी म्हायती नुस्तेमार खात्याची संचालक शर्मिला मोंतेरो हांणी दिली.
बंदीचेर पाळत दवरचे खातरी आमी आमचे कर्मचारी नेमल्यात. पेडणें ते काणकोण मेरेन नुस्तेमारी सर्वेक्षक आनी अधिकारी ही बंदी कोणे मोडची न्हय हे खातीर पाळत दवरतले. जर कोण बंदी मोडटना सांपडलो जाल्यार ताचेर खर कारवाय जातली आनी ताका दंड घालतले, अशी शिटकावणी संचालकान दिली.
नुस्तें नासत जाल्यार गोंयकारांच्या ताळ्या सकयल उंडी वचना. बंदीच्या काळांत चडशें नुस्तें भायल्या राज्यांतल्यान येता. पूण पोंयेंत मेळपी नुस्तें गोंयच्या चडश्या बाजारांनी दिश्टी पडटा. बोटी बंद आशिल्ल्यान नुस्तेकार पोंयेंत काटाळी घालून वा गरोवणी करून नुस्तें मारतात.
मजगतीं, अंदूं नुस्तेमारीचो मोसम कसो गेलो, असो प्रस्न मुरगांव ट्रॉलर धनी संघटणेचे अध्यक्ष जुझे फिलीप डिसोझा हांकां विचारलो. हाचेर जाप दितना तांणी सांगलें, व्हडल्यो बोटी देखीक पर्सीन वापरपी नुस्तेकारांचो अंदूंच्या मोसमांत बरो वेवसाय जालो. पूण ल्हान बोटींनी नुस्तें मारपी ल्हान नुस्तेकारांक मात मार बसलो. 6, 4 आनी 3 सिलिंडर आसपी ट्रॉलर आनी बोटींचे धनी त्रासांत सांपडल्यात. फाटलीं दोन वर्सां तांकां डिझॅलाचेर मेळपी अनुदान सरकारान दिवंक ना. तांकां मानायाचो पगार दिवपाक लेगीत परवडना. तांणी बोटी नांगरून दवरल्यात. डिझॅलाचेर लागपी व्हॅटाचे पयशे तांकां सरकार परतून दितालो आनी तांकां ताचो फायदो जातालो. पूण सरकारान ही येवजण बंद उडयल्या, असो आरोप जुझे फिलीप हांणी केलो. कर्नाटक, महाराष्ट्र आनी केरळ हीं राज्यां डिझॅलाचेर अजून लेगीत अनुदान दिता. गोंय सरकार कित्याक दिवंक शकना? आपणे हालींच मुख्यमंत्री तशेंच नुस्तेमार मंत्र्याची भेट घेतिल्ली आनी डिझॅलाचेर लागपी व्हॅटाचे पयशे परतून दिवपाची मागणी केल्ली. जे वरवीं ल्हान नुस्तेकारांक ताचो फायदो जातलो आनी आपल्याक खात्री आसा, मुख्यमंत्री हो विशय सुटावो करतले, अशी आस्त जुझे फिलीप हांणी उक्तायली.
भायल्या राज्यांतल्या ट्रॉलरांचेर पाळत दवरचीः जुझे फिलीप
नुस्तेमारी बंदी काळांत भायल्या राज्यांतल्यो बोटी येवन नुस्तेमारी करतात तांचेर नुस्तेमार खात्यान पाळत दवरपाची गरज आसा. महाराष्ट्र, कर्नाटक ह्या राज्यांतल्यो बोटी येवन गोंयच्या दर्यांत नुस्तेमारी करतात. भायल्या राज्यांतले नुस्तेकार येतना सुमार 200 बोटी घेवन येतात आनी आमचे शिमेंत घुसतात. तांच्या दर्यांत आमी गेल्यार मात आमकां मार पडटा, असो आरोप जुझे फिलीप हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
