भांगरभूंय | प्रतिनिधी
सांकवाळे सचिवान तीन दिसांनी अहवाल सादर करचो म्हणून दिले निर्देश
वास्को, प्रतिनिधी: योग्य सोपस्कार करिनासतना २००० परस चड घरांक तात्पुरतो घरक्रमांक दिल्ल्या प्रकरणांत सांकवाळच्या सचिवांनी तीन दिसांनी पुराय अहवाल सादर करचो, अशे निर्देश मुरगांव गटविकास अधिकारी इमान्युएल डि कॉस्ता हांणी दिला.
गोंयच्या बेकायदेशीर घरांक तात्पुरतो घरक्रमांक दिवपाचो निर्णय गोंय सरकारान घेतला. तशेंच तात्पुरतो घरक्रमांक दितना कांय जाग्यांचेर हाचो गैरवापर जातना दिसता. सांकवाळे पंचायतीन दोन हजारां परस चड बेकायदेशीर घरांक घरक्रमांक दिल्यात. इतल्या व्हडा प्रमाणांत तात्पुरते घरक्रमांक दितना ताचे प्रक्रिये कडेन आडनदर केल्ल्याचें स्पश्ट जालां.
तात्पुरतो घर क्रमांक दितना हे संबंदी पंचायत मंडळान औपचारिक थाराव घेवपाचो वा मंजुरी दिवपाची गरज आशिल्ली. तशेंच जांणी घरक्रमांका खातीर अर्ज दिल्ले तांच्या घरांची पळोवणी करपाची गरज आशिल्ली. मात ह्या गजालीं कडेन आडनदर करून संबंधितांक घरक्रमांक दिल्यात. हे विशीं गंभीर दखल घेवन गटविकास अधिकारी कार्यालयांतल्यान दोन मेमो धाडून अहवाल मागयल्ले. मात सचिवान कसलोच अहवाल दिवंक ना. ताका लागून गटविकास अधिकारी कार्यालयान २८ मेक परत एक मेमो धाडटना आदल्या धाडिल्ल्या मेमोचो संदर्भ दिलो. सचिवान ह्या प्रकरणाची चवकशी करून पंचायत राज अधिनियम १९९४ प्रमाण योग्य ती कारवाय करपाचे निर्देश दिल्ले. तशेंच सगळ्या संबंदीत कागदपत्रां सयत कारवायेचो अहवाल सादर करप गरजेचें अशेंय नमूद केल्लें. तरीय सचिवान ह्या निर्देशां कडेन आडनदर केल्ल्यान तांकां परत मेमो धाडलो. तशेंच तीन दिसांनी सगळे सोपस्कार पुराय करून अहवाल दिवपाचे निर्देश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
