भांगरभूंय | प्रतिनिधी
म्हापशें, प्रतिनिधी: कामुल्ले पंचायतच्या झितवा बाराजण देवस्थान वाठारांत बेकायदेशीर दोंगर कापणी सुरू आसा. हांगा चिरेखण करपाचो यत्न चल्ला. देखून संबंदीत खात्यान कारवाय करपाची मागणी ग्रामस्थांनी केल्या.
हालीं ह्या मतदारसंघांत बेकायदेशीरपणान रेंव उसपपाचीं प्रकरणां बंद जाल्यांत. ह्या देवस्थान वाठारांतल्या दोंगराचेर बेकायदेशीर कांपणी सुरू आशिल्ल्यान तातुंतल्यान चिरेखाणी सुरू करपाच्यो हालचाली वेगात सुरू आशिल्ल्याचें एका आदल्या पंचान प्रतिनिधीक सांगलें. हो दोंगर कोमुनिदादीचो आशिल्ल्यान हातूंत खंयच्या व्हडल्या मनशाचो आशिर्वाद वा अधिकार्याचो हात आसा, हें ग्रामस्थांक खबर आशिल्ल्यान ताचेर कारवाय करपाची मागणी नागरीक करतात.
मजगतीं, पेडणें म्हालांतल्या मांद्रें मतदारसंघांत दोंगर कापणी चालूच आसा. हे कागाळीची दखल पुलीस घेनात. म्हळ्यार खंयच्या व्हडल्या मनशाचो हात आशिल्ल्यान अशें घडटा. ताका लागून कामुल्ले आनी हेर भागांतल्यान अश्यो बेकायदेशीर गजाली सोंपोवन उडोवप गरजेचें अशें मत थळावे उक्तायतात.
मेळिल्ले म्हायती प्रमाण, चिरेखाणी सुरू करपा फाटल्यान गृह प्रकल्प उभारपाचो प्रस्ताव आसा. देखून बेकायदेशीर मार्गांतल्यान प्रकल्प येवजण चालीक लावपाची शक्यताय आसा. सद्या आचारसंहिता लागू आशिल्ल्यान काम नेटान चालू आसा. ते खातीर नागरिकांनी अजाप उक्तायलां.
जिल्होधिकारी, पुलीस आनी खाण भूगर्भ खात्यान हे विशीं बेगीन पावलां उबारचीं. तशेंच दोंगर कापणी बंद उडोवची अशी मागणी ग्रामस्थांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
