बाणावली जिल्लो पंचायत पोटवेंचणूक 23 जूनाक, वेंचणुकेची सविस्तर कार्यावळ जाहीर

भांगरभूंय | प्रतिनिधी

पंचायतींच्या 10 प्रभागां खातीरुय 23 जूनाक मतदान

पणजी, प्रतिनिधीः बाणावलीचे जिल्लो पंचायत वांगडी अपात्र थारिल्ल्यान खाली आशिल्ले सुवाती खातीर आतां 23 जूनाक पोटवेंचणूक जातली. बाणावली जिल्लो पंचायत पोटवेंचणूके सयत पंचायतींनी खालीं आशिल्ल्या 10 प्रभागां खातीर 23 जूनाकूच पोटवेंचणूक जातली.
जिल्लो पंचायत तशेंच पंचायती खातीर मतपत्रिकेच्या आदारान मतदान जातलें. 23 जूनाक मतदान जाल्या उपरांत 24 जूनाक मतमेजणी जावन निकाल जाहीर जातलें. 23 जूनाक सकाळीं 8 ते सांजे 5 मेरेन मतदान जातलें. जिल्लो पंचायत तशेंच पंचायत पोटवेंचणुके खातीर जिल्लोधिकाऱ्यांची वेंचणूक अधिकारी म्हूण नेमणूक जाल्या. पंचायतीं खातीर संबंदीत म्हालाचे मामलेदार वेंचणुक अधिकारी आसतलें.
जिल्लो पंचायती खातीर उमेदवारांक 5 लाख रूपया खर्चाची मर्यादा आसा. पंचायती खातीर उमेदवारांक चडांन चड 40 हजार रूपया खर्च करपाक मेळटलें. खर्चाचेर नदर दवरपा खातीर राज्य वेंचणूक आयोगान निरीक्षक तशेंच भानगड पंगडाची नेमणूक केल्या.

वेंचणुकेची कार्यावळ अशी :

1. उमेदवारी अर्ज स्वीकारप : 5 जून ते 12 जून (सकाळीं 10 ते दनपारां 1 मेरेन) (आयतारा 9 जुनाक अर्ज घेवचे ना)
2. उमेदवारी अर्जांची छाननी : 13 जून (बिरेस्तारा, 10 उपरांत सुरू)
3. उमेदवारी अर्ज फांटी घेवप : 14 जून (10 ते 2 मेरेन)
4. वेंचणूक लडोवपी उमेदवारांची वळेरी : 14 जून 2024 (दनपारां 2 उपरांत)5. मतदानाची तारीख : 23 जून 2024 (आयतारा, सकाळीं 8 ते सांजे 5 मेरेन)
5. मतमेजणी : 24 जून (सोमारा, सकाळीं 8 वरांचेर सुरवात)

बाणावले महिला मतदार चड

हेर मागासवर्गीयां खातीर (ओबीसी) राखीव आशिल्ल्या बाणावली जिल्लो पंचायतीत वट्ट 20,129 मतदार आसा. दादल्यां परस महिला मतदारांचो आंकडो चड म्हळ्यार 10674 आसा. दादले मतदारांचो आंकडो 9455 आसा. ह्या मतदारसंघात 27 मतदान केंद्रां आसा.

पोंटवेंचणूक जावपी पंचायतीचे प्रभाग

सुकूर (प्रभाग 10, एससी), कुडणें (प्रभाग 2, सर्वसामान्य), शेल्डें (प्रभाग 2, ओबीसी), कुंडय (प्रभाग 7, बायल), केरी (प्रभाग 3, एसटी), वळवय (प्रभाग 2, सर्वसामान्य), बोरी (प्रभाग 11, सर्वसामान्य), असोल्णा (प्रभाग 1, बायल), राशोल (प्रभाग 5, एसटी बायल), सुरावली (प्रभाग 2, बायल) ह्या पंचायतीच्या 10 प्रभागां खातीर 23 जूनाक पोटवेंचणूक जातली.