भांगरभूंय | प्रतिनिधी
काणकोण, प्रतिनिधी: काणकोणच्या विवीध वाठारांनी आतां मेरेन १६ दुयेंती सांपडल्यात. हातुंतल्या कांय जाणांचेर गोमॅकोंत, जाल्यार मडगांवच्या जिल्लो हॉस्पिटलांत आनी कांय जाणांचेर काणकोणच्या समाजीक हॉस्पिटलांत उपचार सुरु आसात. सांपडिल्ल्या दुयेंती मदीं झिल्तावाडी, आमोणे, भूपर, सातोर्ली, लोलयेंच्या दुयेतींचो आसपाव आसा.
चडशे दुयेंती झिल्तावाडी हांगा सांपडिल्ल्यान काणकोणच्या समाजीक भलायकी केंद्रान हाची दखल घेवन धुंवराचो फवारो मारपाक सुरवात केल्या. तशेंच उक्त्यो आशिल्ल्यो उदकाचो टांकयो आनी जंय जळारां जातात तें बंद करपाचें थारायलां.
काणकोण समाजीक भलायकी केंद्राचे नितळसाण निरीक्षक प्रणय नायक हांणी आपल्या वांगड्यांचे मजतीन जागृताय करपाक सुरवात केल्या. तशेंच जळारांची पैदास जावची न्हय हाची जतनाय घेवपाचे नदरेन हांगच्या नागरिकांक मार्गदर्शन केलें.
काणकोणां डेंग्यूचे दुयेंती सांपडिल्ल्यान हाची गंभीरपणान दखल घेवन भलायकी संचालनालयाची उपसंचालक डॉ. कल्पना महात्मे हांणी आपले टिम सयत गांवडोंगरी झिल्तावाडी भागाक भेट दिवन पळोवणी केली. तणेंच भलायकी कर्मचार्यांक मार्गदर्शन केलें.
फाटले धा दीस ह्या वाठारांत काणकोण भलायकी केंद्राचे नितळसाण निरीक्षक प्रणय नायक, डॉ.दिवाकरजी वेळीप हांणी आपले टिमी सयत डेंग्यूचेर नियंत्रण हाडपाचे नदरेन पावलां उबारलीं. जळारांचेर नियत्रंण दवरपाचे नदरेन ह्या वाठारांत धुंवर सोडप, उक्त्यो टाटयो, टायर, कट्ट्यो, नाल्लाचे बोंडे, उक्ताडार सांठून उरपी उदक नियंत्रणांत हाडून घराची भोंवतण नितळ दवरपाचो नागरिकांक उलो मारलो. हातूंत थळाव्या संस्थांनीय सहकार्य करचो अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
