भांगरभूंय | प्रतिनिधी
फोंडें, प्रतिनिधी ःतिस्क-उसगांवा बाजारांत बेशिस्त पार्किंगाची समस्या लोकांक धोक्याची थारपाक लागल्या. रस्त्या कुशीक बेकायदेशीर रितीन गाडयो पार्क केल्ल्यान येरादारीची केंयडी जावपाक लागल्या. सध्या बाजारांत पावसा खातीर आनी भुरग्यांक शाळेंत लागपी सामान विकत घेवपाक गर्दी आसता. शाळा सुरू जाय मेरेन वाठारांत येरादारी पुलीस नेमपाची मागणी लोक तशेंच दुकानदार करतात.
तिस्क-उसगांवा बाजारांत बेशिस्त पार्किंगाक लागून लोकांक त्रास सोंसचे पडटात. कंटेनर सारकिलली जड वाहनांय बाजारांतल्यान यो-वच करतात देखून अपघात जावपाची शक्यताय वाडल्या. वाठारांत बस स्टेशन नाशिल्ल्यान सर्कला लागसार रस्त्या कुशीक प्रवाशांक घेवपाक बस चालकां मदीं सर्त लागता. कांय वर्सां आदीं येरादारीचेर नियंत्रण दवरपा खातीर हे सुवातेर होमगार्ड नेमिल्ले. पूण सध्या हांगा कोणूच नाशिल्ल्यान बेशिस्त पार्किंगाची समस्या वाडत आसा अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
