भांगरभूंय | प्रतिनिधी
वॉशिंग्टन, खबरां संस्था ः अमेरिकेच्या अधिकाऱ्यांनी सायबर फटवणूक केल्ल्याच्या आरोपांत 35 वर्सां पिरायेच्या युन्हे वांग हाका अटक केल्या. तो चीनी नागरीक अशें म्हण्टात. संवसारांतलो सगळ्यांत व्हडलो बॉटनेट चलोवपाचो ताचेर आरोप आसा. वांग हाचेर 1.90 कोटी संगणकांचें जागतीक नेटवर्क चलयिल्ल्याचो आरोप आसा. सायबर गुन्यांव, फटवणूक, चोरी आनी भुरग्यांच्या लैंगीक अत्याचार करपा खातीर ताचो उपेग केला.
अमेरिकेच्या न्याय खात्याच्या म्हणण्या प्रमाण वांग हाणें 911एस 5 नांवाचें बॉटनेट चलयलें, तातूंत 190 परस चड देशांत संसर्गजन्य आयपी ॲड्रेसाचो आस्पाव आसा. प्रशासनान वांगाचेर व्हीपीएन वापरून मालवेयर नेटवर्क चलयिल्ल्याचो आरोप केला. 10 वर्सांत वांग हांणे सायबर फटवणूक करून 824 कोटी रुपया एकठांय केले. ह्या पयशांनी ताणें अमेरिकेंत, चीन, सिंगापूर, थायलंड आनी युएई हांगा लक्झरी गाडयो आनी हेर संपत्ती एकठांय केली. तशेंच ताचे कडल्यान 241 कोटी रुपयांची क्रिप्टोकरंसी जप्त केल्या.
एफबीआय संचालक, ख्रिस्तोफर हांणी हें सगळ्यांत व्हडलें बॉट नेटवर्क थारायलां. वांग हाचेर केल्ले आरोप खरें थारले आनी तो दोशी थारायल्यार ताका चडांत चड 65 वर्सां ख्यास्त जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
