भांगरभूंय | प्रतिनिधी
भारताचो 18 वर्सां पिरायेचो ग्रॅण्डमास्टर आर प्रज्ञानंदान व्हड कामगिरी केली. आर प्रज्ञानंदान सॅव्हॅन्गरांत चालू आशिल्ले नॉर्वे बुद्दीबळ सर्तींत व्हड जैत मेळयलें. हे सर्तीचे तिसरे फेरयेंत आर प्रज्ञानंदान संवसारीक क्रमवारींत पयले सुवातेऱ आशिल्ल्या मॅग्नस कार्लसनाक हारयलो. ह्या दिग्गज खेळगड्या आड प्रज्ञानंदाचें हें क्लासिकल प्रकारांतलें पयलें जैत थारलें.
क्लासिकल प्रकारांत कार्लसनाक हारोवपी आर प्रज्ञानंद भारताचो चवथो ग्रॅण्डमास्टर थारलो. ह्या जैता सयत प्रज्ञानंदान तिसरे फेरये उपरांत 5.5 गुणां सयत पयले सुवातेर पावलो. दुसरे वटेन हे हारीक लागून कार्लसन पांचवे सुवातेर घसरलो.दादल्यांच्या गटांतले दुसरे मॅचींत संवसारीक क्रमवारींत दुसरे सुवातेर आशिल्ल्या अमेरिकेच्या फाबियानो कारुआनान संवसारीक वस्ताद डिंग लिरेनाक हारयलो. हे हारी उपरांत लिरेन गुणतकट्यांत निमाणे सुवातेर घसरलो. अमेरिकेचो हिकारू नाकामुरा आनी फ्रान्साचो अलिरेझा फिरौझा हांचे मदली मॅच बादाबाद उरल्या उपरांत आर्मागेडोनांत नाकामुरान जैत जोडून 1.5 गूण मेळयले. नाकामुरा तिसरे सुवातेर आसा. चवथे फेरयेंत तो प्रज्ञानंदा आड खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
