भांगरभूंय | प्रतिनिधी
तंबाकू हें एक वायट वेसन आसा. आयज संवसारांत खूबशे कडेन तंबाकू आनी ताचे पसून तयार करपी पदार्थ खूबशे जाण खातात, आनी ल्हवू ल्हवू ताचे भकीक पडटात. तंबाकूंत निकोटीन नांवाचें द्रव्य आसता. तें भलायकेक घातक आसता. एका अदमासा प्रमाण संवसारांत दर वर्सा 10 लाखा परस चड लोकांक तंबाकू आनी ताचे पसून तयार केल्ले पदार्थ खाल्ल्यान मरण येता. तशेंच धुम्रपान करतात. संवसारांत 36 टक्के दादले आनी 5 टक्के बायलां तंबाकू वा ताचे पदार्थ खातात. पयलीं हें वेसन बायलां मदीं क्वचीत अशें दिसून येतालें. पूण आयज मात म्हाविद्यालयीन चलयो लेगीत धुम्रपान करतना दिसून येतात. ही हुस्को करपा सारकी गजाल आसा.
तंबाकू पसून सिगार तयार करतात. अखंड सिगार ओडपी चेन स्मोकर आयज खूबशे कडेन आमकां दिसून येतात. ह्या वेसनाक लागून काळजा दुयेंस. कांक्र, टीबी, पुल्मांवाचें दुयेंस, फिग्दाचें दुयेंस बी जातात. व्यंग आसपी भुरगें लेगीत हें वेसन आशिल्ले बायले कडल्यान जल्माक येवपाचो घात आसता. आयज खूबशा शालेय भुरग्यांक तंबाकूचें वेसन लागिल्लें आसता. खूबशे जाण मजे खातीर सिगार ओडटात आनी वेसानाचे भकीक पडटात. सिगार ओडप्यां मदीं दादल्यां बरोबर बायलांचोय वांटो व्हड आसा. सिगार ओडप्या मुखार बसत जाल्यार सिगाराचो उग्र वास येता.
ह्या तंबाकूच्या वेसनाक आडावपा खातीर संवसारीक पांवड्यार यत्न सुरू जाल्यात. संवसारीक भलायकी संघटणेन 7 एप्रील 1988 ह्या दिसा थाराव घेवन 31 मे 1988 सावन हो दीस संवसारीक पांवड्यार तंबाकू विरोधी दीस म्हूण मनोवपाक सुरवात केली. दर वर्सा एक घोशवाक्य ह्या विरोधी दिसा निमतान तयार करतात. 2023 खातीर ‘आमकां अन्न जाय… तंबाकू नाका’ हें वाक्य हे खातीर वेंचलें. जाल्यार 2024 वर्साचें वाक्य “Protecting children from tobacco industry interference”. ह्या दिसा निमतान भौशीक सुवातेर जायरात मोहिमो, आनी तंबाकूचे घात लोकांक पटोवन दितात. विवीध राज्य सरकारां आनी केंद्र सरकाराच्या सहयोगाक लागून खूबशे कायदे केल्यात. भौशीक सुवातेर तंबाकू आनी धुम्रपान करपाक बंदी घाल्या. शालेय वाठारांत 100 यार्ड वाठारांत तंबाकू विक्रेक बंदी घाल्या. 18 वर्सां पिराये सकयल्या भुरग्यांक तंबाकू विक्रेक बंदी अशे खूबशे कायदे केल्यात. अशे जरी कायदे केल्ले आसले तरी आयज लेगीत खूबशे जाण ह्या वेसनाचे भकीक पडल्यात, ही दुर्दैवाची गजाल.
अशा वेसनाधारी लोकांक वेसना पसून पयस करपी खूबश्यो संस्था देशांत कार्यरत आसात. खूबशे कडेन ह्या वेसनाचे दुश्परिणाम सांगून तांकां वेसना पसून परावृत्त करतात. लोकजागृताय करतात. हाचेर योगासनां, ध्यान आनी प्राणायाम हे वरवीं प्रचार करून तांचे वेसन सोडयतात, आनी तांकां तंबाकू सोडा आनी भलायकेची कास धरा हाचें मार्गदर्शन करतात. सान पिरायेच्या भुरग्यां मदीं ई सिगाराचें वेसन लेगीत व्हड प्रमाणांत आसा. संवसारांत धुम्रपान करप्यांचें प्रमाण लेगीत व्हड प्रमाणांत आसा.
निरोगी आनी अनादी जीण जगपा खातीर वेसन मुक्ती जाय. वेसनाक लागून भलायकेचें आनी पयशाचें लेगीत लुकसाण जाता. ताचो त्रास कुटुंबाक जाता. हें सगलें टाळून आनी तंबाकू वेसन पयस करून आरोग्यमय आनी आनंदी जीग जगुया होच संदेश ह्या दिसाचो आसा. आमची जीण ही ईश्वरान दिल्लें वरदान आसा. हे जिणेचो उपेग आमी आनंद आनी मजेंत घलोवंक जाय. तशेंच वेसन सोडिल्ल्यान पयशेय वाटावंक शकतले आनी ते खातीर आमकां कसलेंच वेसन नाका. अशें केल्यार एक सुदृढ आनी आनंदी पिळगी तयार जातली आनी तें एक राष्ट्राचें वैभव थारतलें हातूंत दुबाव ना.
चंद्रार 2030 मेरेन रेल्वे विकसीत जातली
चंद्रार मनीस आतां आपली वस्ती स्थापन करतलो अश्यो खबरो आयल्यात. अमेरिकेची नासा ही संस्था ते खातीर यत्न करीत आसा. ही संस्था आतां चंद्रार मून मिशन खाला घरां बांदपाचो प्लॅन लेगीत तयार करता. तेच बरोबर आतां चंद्रार घटमूट रस्ते तयार करपा खातीर लेगीत संशोधक यत्न करीत आसात. चंद्रार लुनार रेल्वे विकसीत करपाचे आसात. 2030 मेरेन हो लुनार प्रॉजेक्ट अस्तित्वांत येतलो असो नासाचो अदमास आसा. ही बातमी हालींच वाचली. चंद्रा वेली माती, धुल्लाचे कण, तशेंच फातर हांचो योग्य तो वापर करून रस्ते तयार करपाचे
आसात.
आयज चंद्रार कसलेच तरेचें वातावरण ना. तशेंच गुरुत्वाकर्शण लेगीत उणें आसा. सहाजिकूच माती वा धुल्लाचे कण हवेंत हुबत रावतात. हाका लागून चंद्रार संशोधन करपी स्पेस क्राफ्ट पेड्डेर जातात. ते खातीर सुर्याचे मजतीन रस्ते तयार करपाचो प्लॅन शास्त्रज्ञांनी तयार केला. तशें पळोवंक गेल्यार पयली मनीस चंद्रार देंवलो. आतां थंय वस्ती करपाचो ताचो हावेस आसा. रेल्वे लेगीत बांदपाचे आसात. तशेंच रस्ते लेगीत तयार करपाचे आसात. हातूंत अमेरिका सगल्यांत मुखार आसा अशेंच
दिसून येता.
अमेरिकेची ही चंद्रा वयली मोहीम पळोवन आतां हेर देश जेशे रशिया आनी चीन आतां कसली भुमिका घेतात हें म्हत्वाचें आसा. जर अमेरिकेची रस्ते आनी रेल्वे ही मोहीम नासा वरवीं येसस्वी जाली जाल्यार सहाजिकूच अमेरिका हे बाबतींत आपलो हक्क सांगपाक फाटी फुडें जावची ना. एकूणच धर्तरे वेली ही लडाय आतां चंद्रार वतली? हाचे कुतूहल खूबशा जाणांक आसा. हाची जाप येता तो काळूच दितलो.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
