भांगरभूंय | प्रतिनिधी
पणजी स्मार्ट जायत आयल्या. वर्स अखेरेक सगलें जाग्यार पडटलें, अशें दिसता. पूण, फाटलीं 2-3 वर्सां ह्या राजधानी शारांत यो – वच करप्यांक गाडी चलयतना, पांयांनी भोंवतना कितले त्रास जाल्या आसतले, ते तांचे तांकांच खबर. कांय जाण फोंडांनी पडून जखमी जाल्यात, थोड्यांक मरणूय आयलां. आवाज, धुल्लाक लागून भलायकी इबाडल्या. धंदो बसला. ह्या कामा संबंदीच्यो कागाळी इतल्यो वाडल्यो की न्यायालयाक पसून शारभर भोंवून पळोवणी करची पडली. पूण तरीय काम कांसवा गतीन चलता. दोन दिसांनी रस्ते उक्ते जातले म्हणटाले, पूण…. घडये पावसांतूय कामां चलतलीं, अशें दिसता. थळाव्या आमदारान 90 टक्के कामां जाल्यांत अशें म्हणलां खरें. पूण शारांतल्या कांय रस्त्यांचेर पावसाचें उदक तुंबपाची शक्यताय तेय न्हयकारिनात. अशेंच सवकासायेन मोपा ते पणजी मेरेनच्या रस्त्याचें काम चल्लें. बऱ्याच वर्सांनी ते पूर्ण जालें. तें करतना पर्यायी वाटो दवरिल्ल्यो, देखून येरादारीक मरणाचे त्रास जाले नात. येरादारीची कोंयडी जाल्ल्यान गाडयेकारांक उशीर जालो, पूण इत्सीत थळार वरभर उसरां काय जायना पावतले हो विस्वास आशिल्लो. आतां पर्वरी फ्लायओव्हराचें काम सुरू जालां. हांगा सर्व्हीस रस्ते बी काडपाक तसो रुंद जागो ना. आतां कंत्राटदार, सरकाराचे सल्लागार नेमकें कितें करतात तें पळोवचें पडटलें. कारण, चार कडल्यान आयिल्ली येरादारी पर्वरी ते पणजे मेरेनच्या रस्त्याचेर तुंबता. पर्वरे विद्याधिराज सभाघर ते दामियान दे गोवा मेरेन गाडयांच्यो रांको लागिल्ल्यो आसतात. सगलेच जाण हो रस्त्याचो पट्टो सोंपून रुंद म्हामार्ग केन्ना लागतलो, हाची वाट पळयत आसतात.
पर्यायी रस्ते आनी येरादारी वेवस्थापनाचो नियाळ घेतले उपरांतूच पर्वरी फ्लायओव्हराचें काम सुरू करतले. वाठारांतल्या पंचायतीं कडल्यानूय सुचोवण्यो घेतले. सगल्या खात्यांची बसकाय जातली, अशें पर्यटन मंत्री रोहन खंवटे हांणी सांगलां. पर्वरी- पणजी उड्डाण पूल हो शिवधोनूच म्हणचो पडटलो. चारूय दिकांनी विचार करूनच पावलां उबारचीं पडटलीं. अर्थांत गाडयेकारांचोय पालव जायच. दिवचल आनी सरभोंवतणच्या गांवांतल्यान पणजे वचपाचे भोवतेक रस्ते अशीर आसात. ते बेगोबेग रुंद करचे पडटले. फुडल्यान बस आयली जाल्यार वचपी बशीक तिका सायड दिवपाक मेळपाक जाय. इतले पसून रुंद रस्ते कांय कडेन नात. तातूंत रस्त्या कुशीक गाडयो पार्क करून दवरपाची (जागो नाशिल्ल्यान) संवय सगलेच कडेन पळोवपाक मेळटा. खाजगी बशींचे मार्ग बदलचे पडूं येतात. ताका बसधनी तयार आसतले काय, हो मुखेल प्रस्न. दिवचलची येरादारी चोडणेंच्यान, हळदोणच्यान वळयली जाल्यार तिका आडखळ जावन उपकारना. फेरीबोटींचो आंकडोय वाडोवचो पडटलो. मागीर पेडणें, म्हापशेंच्यान येवपी गाडयो आसात. सांगोल्डें, साळगांवच्यान येवपी वाहनांय वाडल्यांत. तातूंतलीं कांय पिळर्ण, बेती मार्गान वचपाक शकतात. पूण त्या रस्त्यार येरादारीची गचमुड्डी जावन उपकारना. कारण वेरेंचो रस्तो अशीर आसा. बशीं परस गिरी, पर्वरी रस्त्याचेर खाजगी मोटारींचो आंकडो हिस्पा भायर वाडला. चडशांनी फक्त एकलो ड्रायव्हलूच आसता. म्हणल्यार 100 जाणांच्यो 100 मोटारी. सुटयेच्या दिसा, आयतारा पर्यटक नासल्यार हो रस्तो तसो रिकामी आसता. उड्डाण पूल बांदतनाच सर्व्हीस रोड तयार करून येरादारी थंयच्यान वळयतलेच. पूण हे रस्ते गुळगुळीत आनी रुंद जाय. नाजाल्यार पर्वरेच्यान पणजे पावपाक एक वर लागतलें.
सरकारी कार्यालयांनी वचपी कर्मचारी सकाळीं 8 ते 10 जाय मेरेन पर्वरी- पणजी रस्त्या वयल्या गाडयांनी, बशींनी दिसतात. तांच्या कामाच्या वेळापत्रकांत मात्सो बदल केल्यार येरादारी मात्शी पातळ जावं येता. सांजचे घराय वतना तांकां बेगीन सोडल्यार गाडयांची खेटाखेट उणी जातली. खाजगी आस्थापनांय सहकार्य करूं शकतात. कोरोनाच्या काळांत वर्क फ्राॅम होम सुविधा जायते कर्मचारी, अधिकारी घेताले. शक्य आसा तांचे खातीर तिचोय वापर करूं येता. तितलोच येरादारी वयलो ताण आनी कर्मचाऱ्याचो त्रास उणो जातलो. गिरी ते पणजी मेरेनचो हो म्हत्वाचो उड्डाण पूल जमता तितले बेगीन बांदून पूर्ण करपाचो यत्न कंत्राटदाराक करचो पडटलो. सरकाराक तो आयकना, अशें खूब जाण म्हणटाले. पूण ह्या रस्त्या बाबतींत तें चलचें ना. कारण वयर म्हणलां ते प्रमाण, चार कडली येरादारी पर्वरे येवन तुंबता. एकदम सगलीं कामां चालू करचे परस रस्त्याचें एक- एक काम हाता वेगळें केल्यार बेगीन जातलें. नाजाल्यार स्मार्ट सिटीचें काम उरलां, तशें काम तुंबत उरतलें.
उड्डाण पुलाचें काम सध्या चालू जालां. पूण तें वयर पर्वरे पावंक ना. तें बेगीन सुरू जावन बेगीन सोंपोवप सगल्यां खातिरूच बऱ्याचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
