भांगरभूंय | प्रतिनिधी
म्हणटात, हांवें केन्नाच दोन समाजांत भेदभाव करूंक ना: आरोप करपाची भाजपाची पोरणी संवय
नवी दिल्ली, खबरां संस्था : देशांतले गिरेस्तकायेचेर, साधनसुविधांचेर मुस्लिमांचो पयलो हक्क, अशें आदले प्रधानमंत्री डाॅ. मनमोहन सिंग हांणी सांगिल्ल्याचो आरोप प्रधानमंत्री नरेंद्र मोदी हांणी वेंचणुकेच्या प्रचारा वेळार केल्लो. उपरांत कॉंग्रेसीन तांकां फावो ती जाप दिली. आतां खूब दिसांनी मोदींच्या ह्या आरोपाचेर डाॅ. सिंग हांणी स्वता प्रतिक्रिया दिल्या. दोन समाजांत हांवें केन्नाच भेदभाव करूंक ना तांणी म्हणलां.
लोकसभा वेंचणुकेच्या निमाण्या पांवड्या पयलीं श्री. सिंग हांणी पंजाबाच्या लोकांक पत्र बरयलां. तातूंत तांणी प्रधानमंत्री मोदी हांच्या आरोपांचेर प्रतिक्रिया दिल्या. पंजाबांतल्या लोकांनी वेंचणुकेच्या निमण्या पांवड्यांत व्हडा प्रमाणांत मतदान करचें असो उलोय तांणी मारला.
पत्रांत नेमकें कितें म्हणलां?
वेंचणुकेच्या प्रचारा वेळार राजकी चर्चा आनी आरोप हांव बारीकसाणेन आयकतालों, पळयतालों. प्रधानमंत्री मोदी हांणी जायते फावट दुस्वासान भरिल्लें भाशण केलें. मोदी हे पयले प्रधानमंत्री, जांणी प्रधानमंत्री पदाची प्रतिश्ठा सकयल देंवयली. तांणी प्रधानमंत्री कार्यालयाची गंभीरताय उणी केली. खंयच्याच प्रधानमंत्र्यान अशे तरेन भाशेचो उपेग करून एका विशिश्ट धर्माक लक्ष्य करपाचो यत्न आयज मेरेन करूंक ना. अशी असंसदीय भास कोणेंच वापरूंक ना, अशें मनमोहन सिंग हांणी पत्रांत म्हणलां.
अशे आरोप करपाची भाजपाची आदली संवय
फुडें तांणी म्हणलां, प्रधानमंत्री मोदी हांणी म्हजे विशींय चुकीचें विधान केलें. म्हज्या जिवितांत हांवें केन्नाच चुकून पसून दोन समाजांत भेदभाव करूंक ना. अशे आरोप करपाची भाजपाची पोरणी संवय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
