भांगरभूंय | प्रतिनिधी
मुंबय, खबरां संस्थाः संवसारांत सगळ्यांत वेगान वाडपी अर्थवेवस्थेचो मान मेळिल्ल्या भारतांत वेगवेगळ्या कारणांक लागून गुंतवणूक पर्यायांनी दावो नाशिल्ली संपत्ती बरीच व्हड आसा. ३१ मार्च २०२३ मेरेन बँकेंतल्यो ठेवी, शेअर, म्युच्युअल फंड, प्रॉव्हिडंट फंड (पीएफ) गुंतवणूक पर्याय आनी विमो येवजण्यांनी सुमार १,९१,५०० कोटी रुपयांचे मालमत्तेचो कोणूच दावेदार नाशिल्ल्याचें दिसून आयलां.
शेअर, म्युच्युअल फंड, प्रॉव्हिडंट फंड आनी हेर अर्थीक साधनांत दावो करिनासतना पडपी रक्कम व्हड आसा आनी ती मेळोवपाची प्रक्रिया दावेदारा खातीर बुचकळ्यांत उडोवपा सारकी आसा. गुंतवणूकदार शिक्षण आनी संरक्षण निधीक (आयईपीएफ) दावो नाशिल्ले शेअर हस्तांतरीत करतात. आयईपीएफच्या आंकडेवारी प्रमाण ३१ मार्च २०२३ मेरेन २५ हजार कोटी रुपयां परस चड मोलाचे शेअर दावो नासतना पडून आसात. हें मुखेलपणान कागदी शेअर सर्टिफिकेट्स आशिल्ल्यान ते डिमटेरिअलायज्ड (डिमॅट) करूंक ना. चड करून मूळ गुंतवणूकदाराक मरण आयले उपरांत ताच्या वारसदारांक हें खबर नासता.
म्युच्युअल फंडाची शिखर संस्था आशिल्ले ‘एम्फी’चे आकडेवारी प्रमाण, म्युच्युअल फंडांत मार्च २०२३ निमाणें ३५,००० कोटी परस चड मोलाचे युनिट्स दाव्या बगर आसात. हातूंत मुखेलपणान गुंतवणूकदार कांय काळा खातीर केल्ली ल्हान गुंतवणूक विसरता, खातें बंद करिनासतना एसआयपी (प्रणालीगत गुंतवणूक येवजण) थांबोवप वा नामनेचे व्यक्तीचो तपशील अद्ययावत करूंक नाशिल्ल्यान निधी तसोच खात्यांत पडून उरता. विमो येवजण्यां कडेन असोच अणभव आसा, जिवीत विमो मळावेली सरकारी कंपनी, भारतीय जिवीत विमो म्हामंडळ वा ‘एलआयसी’ कडेन २१,५०० कोटी रुपया पडून आसात. हाचे वांगडाच खाजगी विमो कंपनीं कडेनय व्हड प्रमाणांत दावो नाशिल्ली रक्कम आसपाची शक्यताय आसा.
नोकरी बदलल्या उपरांत, स्थलांतर वा निवृत्ती उपरांत योग्य दावो दाखल करूंक नाशिल्ल्यान पगारांतल्यान काडिल्लीं प्रॉव्हिडंट फंड (पीएफ) योगदानूय दाव्या बगर उरता. अशी दावो नाशिल्ली पीएफ रक्कम ४८ हजार कोटी रुपया आसा. हाचे वांगडाच बचत वा चालू खात्यांतली दावो नाशिल्ली रक्कम आनी १० वर्सां परस चड काळ सुप्त आशिल्ली स्थिर ठेवी बँको आरबीआय कडेन हस्तांतरीत करतात. रिझर्व्ह बँकेच्या अदमासा प्रमाण भारतांत ६२ हजार कोटी रुपयां परस चड दावो नाशिल्ल्यो ठेवी आसा.
गुंतवणूक पर्याय दावो नाशिल्ली रक्कम (कोटी रुपया)
शेअर : २५,०००
म्युच्युअल फंड : ३५,०००
आयुर्विमा (एलआयसी सयत): २१,५००
भविष्य निर्वाह निधी : ४८,०००
बँक ठेवी : ६२,०००
वट्ट : १,९१,५००
(स्रोत: आयईपीएफ, ऍम्फी, रिझर्व्ह बँक, इर्डा, ईपीएफओ)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
