भांगरभूंय | प्रतिनिधी
नवी दिल्ली, खबरां संस्था ः देशांत उश्णताय वाडत आशिल्ल्यान दरेक जाण मॉन्सून येवपाची वाट पळयत आशिल्ले. फुडल्या 24 वरांत केरळांत पावस दाखल जावपाची शक्यताय हवामान खात्यान काल उक्तायिल्ली. निमाणो मॉन्सून आयज केरळांत पावलो. आनी ईशान्ये कडल्या राज्यांचे दिकेन वाटचाल सुरू आसा अशीं म्हायती हवामान विभागान ट्विट करून दिल्या.
ह्या वर्सा वेळा पयलींच मान्सून केरळांत पावलो अशें हवामान खात्यान सांगलां. हाका लागून केरळांत वाऱ्या सयत व्हड प्रमाणांत पावस पडटा. मजगतीं, कांय दिसां आदीं केरळांक रेमाल चक्रवादळाचो धपको बशिल्लो. हाका लागून पावसाचो प्रवाह नेटान बंगालच्या उपसागरात पावलो. ईशान्येकय ढग वाडपाक लागिल्ले. रेमाल चक्रवादळाक लागून अस्तंत बंगाल, ओडिशा सयत ईशान्य भारतांतल्या जायत्या राज्यांनी शेनवारा सावन पावस पडटा.
विशेश म्हळ्यार सादारणपणान 1 जून मेरेन मान्सून केरळांत दाखल जाता, जाल्यार 5 जून मेरेन ईशान्येक आशिल्ल्या चडशा राज्यांनी दाखल जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
