भांगरभूंय | प्रतिनिधी
बिबट्यांचो बंदोबस्त करचो, पेडणेंच्या नागरिकांची मागणी
पेडणें, प्रतिनिधी ः तुयांतल्या भोमवाड्या वयल्या चंदन नायक हांच्या घरा भायर बांदून दवरिल्ल्या सुण्याचेर बिबट्यान हल्लो करून ताका मारलो. हाका लागून लोकां मदीं भंयाचे वातावरण निर्माण जाला.
पेडणें तालुक्यांतल्या गांवांनी बिबटो भोंवपाचें प्रमाण हालीं वाडलां. चार दिसां आदीं वागान एका वाठारांतल्या पाळीव जनावराचेर हल्लो केल्लो. काल रातच्या 11 वरांचेर चंदन नायक हांच्या बांदून दवरिल्ल्या सुण्याचेर बिबट्यान हल्लो केलो. हांतूत सुण्याक मरण आयले. दोन म्हयन्यां आदीं तुये वाठारांतल्याच अजून एका सुण्याचेर हल्लो जाल्लो. ताचे आदीं सोणयें तुयें हांगा दोन- चार सुण्यांचेर हल्लो जाल्लो. फाटल्या वर्सा तुयें देऊळवाडो हांगच्यान पार्सेतलो एक तरणाटो कामा वयल्यान घरां येताना ताचेर हल्लो करपाचो यत्न केल्लो. तांतूत तो जखमी जाल्लो.
ह्या बिबट्यांचो, वागांचो बंदोबस्त करचो अशी मागणी नागरिक करतात. पूण अजून मेरेन हांतूत रान खात्याक शंबर टक्के येस मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
