भांगरभूंय | प्रतिनिधी
लाखांनी सैनिकांचो ‘यूएन पीस किपिंग’ मिशनांत आसपाव
खार्टूम, खबरां संस्था : सुदान देशांत दोन दिसां पयलीं भारतीय जवान आनी चिनी सैनिकांनी रस्सीखेच (दोरी ओडपाचो खेळ) खेळ्ळी. हो खेळ युनायटेड नेशन्स पीसकीपिंग मिशनान आयोजीत केल्लो. हातूंत भारतीय सैनिकांक जैत मेळ्ळें.
खेळा मजगतीं, भारतीय महिला सैनिक टग ऑफ वॉरांत वांटेकार जाल्ल्या सैनिकांची उर्बा वाडयतना दिसल्यो. चीनी सैनिकांनी चीनाचो बावटो घेवन आपल्या वांगड्यांक उर्बा दिली. हाचे मजगतीं दोनूय देशांच्या सैनिकांच्या शरिरीक कुशळटायेची आनी कामगिरीची चांचणी घेतली.
२ लाखां परस चड सैनिक मिशनांत
भारतीय सैनीक ४९व्या जोड राष्ट्र शांती मोहिमे खातीर आफ्रिकेंत आसात. आता मेरेन २ लाखां परस चड भारतीय सैनिकांनी अशा मोहिमांनी वांटो घेतला. फाटल्या वर्सा मेरेन असल्या मोहिमांनी १७५ भारतीय जवानांक आपलो जीव वगडावचो पडिल्लो.
२०१४ त भारतीय तुकडी संयुक्त राष्ट्रांच्या शांतिकाय मोहिमेंत सेवा दिवपी तिसरें सगळ्यांत व्हडलें दळ जालें. २४ मार्च २००५ सावन सुदानांतलें सरकार आनी पिपल्स लिबरेशन मुव्हमेंट हांचे मदीं शांतिकाय प्रस्थापीत करपाचो यत्न करता. हे खातीर ते थंय मानवतावादी मजत, संरक्षण आनी मानवी हक्कांची राखण करतात.
दक्षीण सुदानांत भारतीय लश्कराचे जवान जीव वाटावप ते रस्ते बांदप मेरेन सगळें काम करपाक व्यस्त आसात. २०२२ वर्सा संयुक्त राष्ट्र पदक फावो जाल्ल्या बायलां मदीं भारतीय लश्करी अभियंती करिश्मा कथायत हांचोय आस्पाव आशिल्लो.
भारतीय जवानांनी ५ भुरग्यांचो जीव वाटायलो
भारतीय लश्कराचे जवान दक्षीण सुदानांत वैजकी सुविधाय दितात. सप्टेंबर २०२२ वर्सा भारतीय लश्कराच्या वैजकी कर्मचार्यांनी आपत्कालीन शस्त्रक्रिया करून ५ भुरग्यांचो जीव वाटावलो. तांचेर योग्य वेळार उपचार जावंक नाशिल्ले जाल्यार तांचो जीव वचपाचो अशें शांतताय राखणदार मेजर अमनप्रीत कौर हांणी सांगलें.
फाटल्या वर्साचे सुरवातेक दक्षीण सुदानांतल्या शांतताय मोहिमेंतल्या उत्कृश्ट सेवे खातीर ११७१ भारतीय लश्करी सैनिकांक जोड राष्ट्र संघटनेचें पदक फावो जाल्लें. हातूंत ५ बायलां सैनिकांचो आस्पाव आशिल्लो.
संयुक्त राष्ट्रांच्या शांतताय मोहिमेच्या आंकडेवारी प्रमाण, यूएनान आतां मेरेन ७० परस चड शांतताय मोहिमा पुराय केल्यात. हातूंत भारतीय लष्करान उमेदीन वांटो घेतला. ह्या सगळ्या मोहिमेंत सगळ्यांत चड सैनीक धाडपी टॉप-१० देशांनी भारत आनी पाकिस्तान हांचो आसपाव आसा.
कॉंगोंत तैनात आशिल्ली मेजर राधिकाचो भोवमान करतले
कॉंगोंत संयुक्त राष्ट्र (UN) मिशनांत सेवा दिल्ली भारतीय मेजर राधिका सेन हांकां लश्करी पुरस्कारान भोवमानीत करतले. संयुक्त राष्ट्रांचे सरचिटणीस अँटोनियो गुटेरेस हे तांकां पुरस्कार भेटयतले.
भारतीय आनी फ्रेंच सैन्या मदींय रस्सीखेच जाली
सोमारा (२७ मे) भारतीय आनी फ्रेंच सैनीक हांचे मदींय रस्सीखेच सर्त जाल्ली. मेघालयांतल्या उमरोय हांगा हो खेळ जालो. भारत आनी फ्रांसाच्या सैन्यांनी जोड लश्करी व्यायामाचो एक भाग म्हूण हात मेळयले, ताका ‘शक्ती २०२४’ अशें नांव दिलां. हाचे खाला फ्रेंच सैन्यान १३ ते २६ मे मेरेन जोड लश्करी व्यायामांत वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
