भांगरभूंय | प्रतिनिधी
संवसारीक क्रमवारींत पयले सुवातेर आशिल्लो सर्बियाचो नोवाक जोकोवीच आनी ग्रिसाचो स्टेफानोस शित्सिपास हांणी आपलीआपली मॅच जिखून फ्रॅंच ओपनाचे फुडले फेरयेंत सुवात मेळयली.
जोकोविचा कडल्यान सर्वोत्कृश्ट प्रदर्शन जावंक नासलें तरी ताणें पियरे ह्युजेस हर्बर्टाक सरळ सेटांनी हारोवन दुसरे फेरयेंत सुवात मेळयली. ताणें हर्बर्टाक 6-4, 7-6 आनी 6-4 अशा तीन सेटांनी हारयलो.
आपूण हाचे परस बरें प्रदर्शन करपाक शकतालो. फुडल्या मॅचींनी आनीक बरें प्रदर्शन करपाचो आपलो यत्न आसतलो अशें मॅच सोंपल्या उपरांत पत्रकारां कडेन उलयतना सांगलें.
जोकोविचा खातीर 2024चो हंगाम अपेक्षे प्रमाण बरो वचूंक ना. तरी आसतना ताची नदर 25व्या ग्रॅण्ड स्लॅम किताबाचेर आसा. जोकोविचान तीन खेपे ही सर्त जिखल्या. ताका आपली पयली सुवात राखपाक परतून एकदा फायनलींत सुवात मेळोवपाक जाय. पूण, अंदूंच्या हंगामांत खेळिल्ल्या खंयचेच सर्तीचे फायनलींत ताका सुवात मेळोवपाक जमूंक ना. अंदूं तो तीन सर्तींचे सेमी फायनली मेरेन पावला.
जोकोवीच फुडले फेरयेंत स्पेनाच्या रॉबर्टो कार्बेलासा आड खेळटलो.
मजगतीं, ग्रिसाच्या शित्सिपासान तिसरे फेरयेंत सुवात मेळयली. पूण, ते खातीर ताका खर संघर्श करचो पडलो. जर्मनीच्या डॅनिएल अल्तमायरा आड ताणें 6-3, 6-2, 6-7 (2), 6-4 फरकान जैत जोडून फुडले फेरयेंत सुवात मेळयली.
फाटल्या म्हयन्यांत मोंते कार्लो सर्त जिखपी आनी बार्सेलोना सर्तीचे फायनलींत सुवात मेळोवपी त्सित्सिपासाक क्ले कोर्टाचेर खेळपाक खूब आवडटा.
ताणें नेटान सुरवात लेगीत केली. पयले दोन सेट एका वरां भितर 6-3 आनी 6-2 अशे जिखिल्ले. पूण, तिसऱ्या सेटांत जर्मनीच्या खेळगड्यान खर प्रतिकार केलो आनी सेट टायब्रेकरांत व्हेलो आनी 6-7 (2) असो जिखलो लेगीत. चवथ्या सेटांत मात शित्सिपासान आपल्या अणभवाच्या नेटार जबरदस्त खेळ करून 6-4 जिखून फुडले फेरयेंत सुवात मेळयली.
मजगतीं, पोरूं फायनलींत सुवात मेळोवपी कास्पर रुड आनी आदली ग्रॅण्ड स्लॅम वस्ताद एरिना सबालेंका आनी एलेना रिबाकिना हांणी लेगीत फुडले फेरयेंत सुवात मेळयली.
2022चो उप वस्ताद रुड हाणें फिलिप मेलिगेनी एल्वेस हाका 6-3, 6-4 आनी 6-3 असो हारयलो. दोन खेपेची ऑस्ट्रेलियन ओपनाची वस्ताद सबालेंकान एरिका आंद्रिवाक 6-1 आनी 6-2 अशी हारयली. जाल्यार 2022ची विम्बल्डन चॅम्पियन रिबाकिनान ग्रीट मिनेन हिका 6-2 आनी 6-3 अशी हारोवन फुडले फेरयेंत सुवात मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
