भांगरभूंय | प्रतिनिधी
फोंडें: कवळ्यां श्रीशांतादुर्गा शिक्षण समितीच्या पंचकोश विकास संकल्पनेचेर आदारीत पुराय वेळ शाळा आशिल्ल्या श्रीशांतादुर्गा गुरुकुलाचो भव्य स्नेह मेळावो हालींच डॉ. प्रेमानंद मुकूंद कुवेलकार सभाघरांत व्हड उमेदीन जालो. 2012 सावन सुरू आशिल्ल्या श्रीशांतादुर्गा गुरुकूल ह्या पुराय वेळ शाळे खातीर आतां मेरेन आपली वेगळ्यावेगळ्या पांवड्यार सेवा दिल्ले सद्याचे आनी आदले विद्यार्थी, शिक्षक आनी शिक्षकेत्तर कर्मचारी हांचे एकामेकां कडेन तशेंच शाळे कडेन आशिल्ले संबंद, ऋणानुबंध अदीक घटमूट जावचे ह्या उद्देशान ह्या स्नेह मेळाव्याचें आयोजन केल्लें.
संवसारभरांत नामना आशिल्ल्या पुण्यांतल्या ज्ञानप्रबोधिनी गुरुकूल निगडीत श्रीशांतादुर्गा गुरुकूल संलग्न आसा. गुरुकूलचे मुखेली आदित्य शिंदे हे ह्या स्नेह मेळाव्याचे खाशेले सोयरे म्हूण हाजीर आशिल्ले.
तांणी आपल्या उलोवपांत म्हणलें, गुरुकुलाचो शिक्षक हो फक्त शिक्षक नासून तो आचार्य आसता. आनी आचार्याच्या आचरणांतल्यान विद्यार्थी हो आपले आपूण घडत वता. ताका लागून हेर शाळां परस गुरुकूल हें वेगळें आसता आनी ते खातीर आचार्य जावनूच गुरुकुलाचो शिश्य हो घडोवचो पडटा.
सांजवेळच्या सत्रांत माचयेर श्रीशांतादुर्गा शिक्षण समितीचे अध्यक्ष श्रीकुमार सरज्योतिषी, ज्ञानप्रबोधिनी निगडीचे मुखेली आदित्य शिंदे, शांतादुर्गा गुरुकुलाचे आदले मुखेली आनी गुरुकुलाचे बुन्याद घाल्ले वांगडी गोविंद देव, गुरुकुलाचे आदले वेवस्थापक सुभाष जाण, गुरुनाथ टेंगसे, वेवस्थापन वांगडी गोविंद जोतकर, गुरुकुलचे आदले गुरूकुल मुखेली विजयकुमार शेट्टी आनी श्रीकृष्ण जोशी, पालक शिक्षक संघाचे अध्यक्ष सागर तारी बी मानेस्त हाजीर आशिल्ले.
ह्या वेळार सेवे खातीर कृतज्ञताय उक्तावपाच्या उद्देशान दरेक शिक्षक तशेंच शिक्षकेत्तर वांगड्यांचो गुरुकुला वतीन सन्मान चिन्न दिवन भोवमान केलो. गुरुकुलांतल्यान पास जावन गेल्ले विद्यार्थी विवीध मळार विशेश कामगिरी करतात. तांचोय ह्या वेळार मानेस्तांचे हस्तुकीं भोवमान केलो.
पुराय कार्यावळीचें सुत्रसंचालन आदली विद्यार्थिनी अन्वेषा अंकूश प्रभू हांणी केलें. स्नातक संघटणेचे उपाध्यक्ष सात्वीक सरज्योतिषी हांणी हाजीर आशिल्ल्याचें उपकार मानले. जाल्यार स्नातक संघटणेची वांगडी गौरांगी मिरींगकार हांच्या पसायदानान कार्यावळीची सांगता जाली.
श्रीशांतादुर्गा गुरुकुलाक मेळिल्ले नवे वेवस्थापक नारायण नावती आनी गुरुकूल मुखेलीपदार निवड जाल्ले संभाजी खामकार हांचें अभिनंदन ह्या वेळार केलें. गुरुकूल शाळेच्या इतिहासांत पयलेच फावटी आदली विद्यार्थी संघटणा हो नवो प्रकल्प राबयलो. हातूंत आदले बॅचींतलो एक विद्यार्थी अशा विशेश विद्यार्थ्यांचो मेळून एक आठ वांगड्यांचो नवो पंगड जाहीर केलो. आदित्य शिंदे हांणी हे नवे संघटणेक आदले हो शब्द वापरिनासतना स्नातक विद्यार्थी संघ अशें नामकरण करून संघ जाहीर केलो.
ह्या संघाच्या अध्यक्षपदार वेदांग नंदकुमार नायक जाल्यार उपाध्यक्षपदार सात्वीक श्रीकुमार सरज्योतिषी हांची निवड केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
