भांगरभूंय | प्रतिनिधी
पणजीः एच. मनोज हांच्या ‘नवी दिका’ पुस्तकाचें प्रकाशन महाबळेश्वर सैल, प्रो. महेंद्र देसाय, डॉ. एन. एम. जंबगी, पुस्तकाचे प्रकाशक दिलीप बोरकार हांचें हस्तुकीं जालें. रवींद्र भवन, मनोहर पर्रीकार सभाघर बायणा वास्को हांगा आयोजीत केल्ले हे सोबीत कार्यावळीक एच. मनोज हांचीं घरचीं, इश्ट, तशेंच साहित्यीक मोगी हाजीर आशिल्ले.
आयज ज्या मनशां कडल्यान आदर्श समाजाची निर्मणी जावची आसता तेच मनीस मार्ग भटकूंक लागले जाल्यार सामान्य मनशांक मार्गदर्शक मेळप कठीण जातलें. हें चित्र बदलतलें जाल्यार निती मुल्यां आत्मसात करप खूब गरजेचीं. एच मनोज हांच्या लेखनांतल्यान समाजाक सकारात्मक दिका दाखोवपाचे बळगें मेळपाची दाट शक्यताय आसा. अशें मत भारतीय साहित्यीक, सरस्वती सम्मान फावो जाल्ले महाबळेश्वर सैल हांणी मुखेल सोयरे ह्या नात्यान उलयतना म्हणलें.
प्रो. महेंद्र देसाय हांणी पुस्तकाचेर विचार मांडटना म्हणलें, खंयच्याय लेखकान बरयता आसतना प्राणसुत्राक बादा हाडची न्हय. आनी हें बरपाचें ‘प्राणसुत्र’ जपपाचें तंत्र ‘नवी दिका’ बरयतना लेखकाक बेस बरें जमलां.
पुस्तकाचे प्रकाशक दिलीप बाब बोरकार हांणी सकारात्मक आनी सक्षम समाज निर्मणे खातीर अशे तरेचीं पुस्तकां उजवाडाक येवप काळाची गरज आशिल्ल्याचें म्हणलें.
ह्या पुस्तकाची प्रसिध्दी शिक्षणीक मळार आपूण स्वता करतलों अशें डॉ. एन. एम. जंबगीन आपलें मनोगत उक्तायतना स्पश्ट केलें.
आयज दरेक पालक आपल्या भुरग्याक सगले तरेचें सूख दिवपाचो यत्न करता. पूण कसल्या ना कसल्या कारणांक लागून शाश्वत मुल्यां तांचे भितर रुजोवंक फाटीं पडटात. तो शीण भरून काडचो अशें एक शिक्षक ह्या नात्यान म्हाका दिसता, तेन्ना म्हजें लिखाण सुरू जाता. अशें मत पुस्तका विशीं लेखक एच. मनोज हांणी उक्तायलें, आनी सगल्या मानेस्तांचें उपकार मानले.
कार्यावळीचें सुत्रसंचालन नागेश ओझरकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
