भांगरभूंय | प्रतिनिधी
दिवचल उपजिल्होधिकाऱ्याचो आदेश; आपत्कालीन वेवस्थापन मंडळाचे बसकेंत मार्गदर्शन
भांगरभूंय । प्रतिनिधी
दिवचलः पावस सुरू जावपाक सप्तकभर आदीं मॉन्सूनपूर्व कामां ताकतिकेन पुराय करात. खणिल्ले रस्ते दुरुस्त करात, वीज, उदक वेवस्था सुटसुटीत करात तशेंच व्हाळ, गटारां नितळ करात, असो आदेश दिवचलचे उपजिल्होधिकारी रमेश गांवकार हांणी आपत्कालीन वेवस्थापन मंडळाचे बसकेंत दिले. तशेंच पंदरा दिसां भितर उरिल्लीं सगळीं कामां पुराय करात आनी ताचो अहवाल सादर करात, अशेंय तांणी विवीध खात्यांच्या अधिकाऱ्यांक दिले.
आपत्कालीन वेवस्थान मंडळाची बसका उपजिल्होधिकारी गांवकार हांचे अध्यक्षते खाला मामलेदार विमोद दलाल, नगराध्यक्ष कुंदन फळारी, मुख्याधिकारी सचीन देसाय हांचे हाजिरेंत जाली. ह्या वेळार गांवकार उलयताले.
ह्या वेळार उदक वेवस्थापन, उदकाचो विलो, वीज सरयांक घातक आशिल्लीं झाडां, सांचिल्लीं गटारां, खणून दवरिल्ले रस्ते, भौशीक भलायकेची समस्या, गांवांनी वाडपी कोयराची समस्या अशें साबार विशय चर्चेक आयले. ह्या वेळार आपत्कालीन वेवस्थापन सतर्क करप, दिवचले मुख्य कार्यालयांत 24 वरां आपत्कालीन नियंत्रण विभाग सुरू करप, पंचायत पांवड्याचेर समित्यो नेमून विभाग सुरू करचो, घोळटे पंगड तशेंच आपत्कालीन यंत्रणा सक्षम करचे खातीर खूब जाणांनी सुचोवण्यो केल्यो. तशेंच अधिकारी वर्ग आस्वासनां दितात, पूण ती योग्य वेळांत पुराय जायनात अशी खंत नगरसेवक, थळावे सरपंच, पंच वांगड्यांनी उक्तायली.
हे बाबतींत आपूण विशेश लक्ष दितलों. पावसाळ्यांत कोणाकूच त्रास जावचो ना हाची जतनाय घेतलों, अशें आमदार डॉ. चंद्रकांत शेट्ये हांणी सांगलें, तशेंच सगळीं कामां वेळार पुराय करचीं, अशें तांणी मागलें.
भौशीक भलायकेची जतनाय घेवप तशेंच सगळ्या पंचायतींनी आनी शारांत आपत्कालीन नियंत्रण विभाग सुरू करून एकादी घडणूक घडली जाल्यार ताकतिकेन फाटपुरवण करची. ह्या कामांत सगळ्यांनी आदार करचो आनी जतनाय घेवची, असो उलो आमदार डॉ. शेट्ये हांणी मारलो.
भुंयगत वीज केबल घालपाचें काम नेटान चल्लां, तेच वांगडा रस्तेय खणपाचें काम तितल्याच नेटान चालू आसा. केबल नॅटवर्क तशेंच वीज केबल, उदकाचीं पायपलायन घालपाचीं कामां अजून चल्ल्यांत. ताका लागून हीं कामां केन्ना पुराय जातलीं, असो प्रस्न निर्माण जालां. पावसान घालून घेतलें जाल्यार खणिल्ल्या रस्त्यांचेर पावसाचें उदक सांचतलें आनी सगळे कडेन चिखल जातलो, असो भंय लोकांनी उक्तायला. घातक तळीं, खणीं, सैमीक वझरे अश्या सुवातांचेर लोकांनी जतनाय घेवपा संबंदांत बसकेंत चर्चा जाली. उदकाच्या आकर्शणान दुसऱ्या गांवांतले लोक येतात आनी बुडटात. हाचेर पुलीस तशेंच संबंदीत खात्यान विशेश कार्यवाही करची, अशीय सुचोवणी लोकांनी केली.
पंदरा दिसांनी नियाळ घेतलोः डॉ. शेट्ये
आपत्कालीन नियंत्रण वेवस्थापना वांगडाच हेर खूबशे उदरगत येवजणेचे मुद्दे लेगीत बसकेंत चर्चेक आयले. फुडल्या पंदरा दिसांत हे बसके संबंदांत कसली कसली कार्यवाही जाल्या, हाचो नियाळ घेतले, अशें आमदार डॉ. चंद्रकांत शेट्ये हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
