भांगरभूंय | प्रतिनिधी
वास्को, प्रतिनिधी: दर्याच्या उदकांत उद्देगीक वसणुकेंतलें घाणयारे उदक गेल्ल्यान नुस्तीं मरता असो दावो कांय थळाव्या नुस्तेंकार भावांनी केला. हे विशीं खोलायेन चवकशी करपाची गरज तांणी उक्तायली. दर्याच्या उदकांत जावपी प्रदुशण बंद करचें ना जाल्यार आमकां फुडलें पावल उबारचें पडटलें अशी शिटकावणी तांणी दिली.
मजगतीं, ह्या जावपी प्रदुशणाची दखल गोंय राज्य प्रदूशण नियंत्रण मंडळान घेवन हांगच्या उदकाचे नमुने आनी मरण आयिल्लें नुस्तें तपासणे खातीर व्हेलां. हांगच्या कारखान्यांतलीं रसायनीक रसायनां व्हांवत येवन दर्याच्या उदकांत मिसळटात हें उक्ताडार आयलां. अहवाला उपरांत फुडलें चित्र स्पश्ट जातलें अशें संबंदीत अधिकार्यांनी सांगलें.
वेळसांव दर्यादेगेर ल्हारां सयत मेल्लें नुस्तें येता. ताका लागून थळाव्या नुस्तेंकारांनी चिंता उक्तायल्या. आदींय अशे तरेच्यो घडणुको घडिल्ल्यो. हे विशीं संबंदीत कंपनींक आनी अधिकार्यांक कळयल्या उपरांत लेगीत हाचेर कायच उपाय जावंक ना असो आरोप थळाव्या नुस्तेंमार्यांनी केला. नुस्तेंमार्यांचें लुकसाण जाल्ल्यान हे कंपनीन योग्य ती लुकसाण भरपाय दिवची गरज आशिल्ल्याचें तांणी स्पश्ट केलां.
दर्यांतल्या प्रदुशणाची दखल घेवन हे विशीं आवाज करपा खातीर वेळसांवच्या नुस्तेंमार भावांनी तशें थळाव्यांनी एकठांय येवपाचीय गरज उक्तायल्या. बुधवारा कांय नुस्तेंकार भावांनी एकठांय येवन ह्या जावपी प्रदुशणाचो निशेद केलो. संबंदीत कंपनीन उद्देगीक घाणयारें उदक दर्यांत सोडपा खातीर बरेंच पयस मेरेन पायप घातलां. ह्या पायपांतल्यान रसायनीक रसायनां भायर पडून उदकांत मिसळिल्ल्यान नुस्तें मरता. दर्याच्या उदकांत, गांवच्या तळ्यांनी ही रसायनां सोडटात असो दावो तांणी केला. ह्या पायपा वरवीं प्रदुशण जाल्ल्यान नुस्तीं मरतात असो आरोप तांणी केला. हीं रासायनां मनशाचे जिणेक तशेंच नुस्त्यांक धोक्याचीं आसात. हे विशीं आमी जायते फावट आवाजूय केला. संबंदीत सरकारी यंत्रणेच्या लक्षांत हाडूनय दिलां. मात योग्य कारवाय आजूनय जावंक नाशिल्ल्याचें तांणी स्पश्ट केलां.
हांगाच्या उदकाची नेमान तपासणी जावप गरजेचें अशीय मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
