गोंय परत तापलें

भांगरभूंय | प्रतिनिधी

मान्सून 24 वरांत केरळांत दाखल जावंये

पणजी, बातमीदार ः फाटल्या कांय दिसां सावन राज्यांत दमट आसली तरी पावसाची नोंद जावंक ना. हाका लागून राज्यांतलें चडांत चड तापमान परतून वाडत आसा. बुधवारा पणजेत चडांत चड तापमान 34.4 अंश सेल्सियस आनी मुरगांवांत 34 अंश सेल्सियस तापमान नोंद जालां. फुडले दोन दीस राज्यांत तापमान 35 अंश सेल्सियस मेरेन पावपाची शक्यताय हवामान खात्यान उक्तायल्या.
हवामान खात्यान 29 मे ते 4 जून मेरेन पावस पडपाची शक्यताय उक्तायल्या. पूण ह्या दिसांत कसलोच अलर्ट जारी करूंक ना. तशेंच 29 मे ते 1 जून ह्या काळांत वाऱ्याचो वेग वराक 35 ते 55 किमी. पावपाची शक्यताय आशिल्ल्यान नुस्तेमारांनी दर्यांत वच्चें न्हय असो उलो खात्यान मारला.
1 मार्च ते 29 मे ह्या काळांत राज्यांत सरासरी 117.9 मिमी. पावसाची नोंद जाल्या. ह्या काळा मजगतीं राज्यांत सरासरी 52.7 मिमी पावसाची नोंद जाता. पूण अंदूंचो आडवेळो पावस 106 टक्क्यांनी चड आसा. ह्या काळांत राज्यांत फोंड्यां सगळ्यांत चड 285.4 मिमी. पावसाची नोंद जाली. हाचे उपरांत पोरणें गोंय 197.6 मिमी., पणजेत 169.6 मिमी., जाल्यार वाळपय 152.6 मिमी. पावसाची नोंद जाल्या.

मान्सून 24 वरांत केरळांत
अनुकूल हवामानाक लागून श्रीलंकेंत, बंगालच्या उपसागरांत पावस दाखल जाला. फुडल्या 24 वरांत केरळांत पावस दाखल जावपाची शक्यताय हवामान खात्यान उक्तायल्या.