भांगरभूंय | प्रतिनिधी
राज्यांतल्या २५ टक्के उमेदवारां आड गुन्यांवांची नोंद
पणजी, गणेश जावडेकार: लोकसभा वेंचणुकेंत गुन्यांव नोंद आशिल्ल्या उमेदवारांच्या प्रमाणां मदीं गोंय पांचवे सुवातेर आसा. लोकसभा वेंचणूक लडयल्ल्या गोंयांतल्या उमेदवारां मदल्या २५ टक्के उमेदवारां आड गुन्यांवांची नोंद आसा. हातूंत परत ६ टक्के उमेदवारां आड गंभीर स्वरूपाचे गुन्यांव नोंद आसात. असोसिएशन ऑफ डेमोक्रॅटीक रिफॉर्मस (एडीआर) संस्थेन विश्लेशणा उपरांत ही म्हायती जाहीर केल्या.
लोकसभा वेंचणुकेच्या मतदानाचो आतां एकूच पावंडो उरला. निमाण्या म्हळ्यार सातव्या पांवड्या खातीर १ जूनाक मतदान जातलें. गोंयच्या दोन सुवातां खातीर ७ मेक मतदान जालें. सातव्या पांवड्या खातीर ज्या मतदारसंघांनी मतदान जातलें, थंयच्या उमेदवारांची प्रतिज्ञापत्रां उपलब्ध जाल्ल्यान देशांतल्या सगळ्या उमेदवारां विशींची म्हायती एडीआराक उपलब्ध जाल्या. सगळ्या राज्यांतल्या उमेदवारां आड गुन्यांव नोंद आसा.
गुन्याव नोंद आशिल्ले उमेदवार केरळांत सगळ्यांत चड म्हळ्यार ३५ टक्के आसात. गुन्यांव नोंद आशिल्ल्या उमेदवारां मदीं केरळ पयले सुवातेर आसा. केरळ उपरांत नागालँड आनी दादरा नगर हवेली, दमण आनी दिव हीं राज्यां दुसरे सुवातेर आसात. ह्या दोनूय राज्यांनी गुन्यांव नोंद आशिल्ल्या उमेदवारांचें प्रमाण ३३ टक्के आसा. मेघालयांत ३० टक्के उमेदवारां आड गुन्यांवांची नोंद आसा. मेघालय तिसरे सुवातेर आसा. मेघालया उपरांत झारखंड राज्यांत २९ टक्के उमेदवारां आड गुन्यांवांची नोंद आसा. मेघालय चोवथे सुवातेर आसा. मेघालया उपरांत गोंयांतल्या २५ टक्के उमेदवारां आड गुन्यांवांची नोंद आसा. गुन्यांव नोंद आशिल्ल्या उमेदवारांचे वळेरेंत गोंय पांचवे सुवातेर आसा. गोंयां सयत ओडिशा, उत्तर प्रदेश आनी लक्षद्वीप पांचवे सुवातेर आसा. ह्या राज्यांनी गुन्यांव नोंद आशिल्ल्या उमेदवारांचें प्रमाण २५ टक्के आसा.
त्रिपुरा राज्यांत गुन्याव नोंद आशिल्ल्या उमेदवारांचें प्रमाण सगळ्यांत उणें म्हळ्यार फकत ६ टक्के आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
