भांगरभूंय | प्रतिनिधी
बापूय आनी भावाचो खून करून तें मोगी सयत गोंयांतूय पाविल्लें
जबलपूर, खबरां संस्था : जबलपूरांत १५ मार्चाक आंगार कांटो हाडपी घडणूक घडिल्ली. जबलपूर रेल्वेंत काम करपी राजकुमार विश्वकर्मा आनी तांच्या ६ वर्सां पिरायेच्या चल्याचो खून जाल्लो. पुलिसांनी हे विशींचो तपास केलो तेन्ना धक्को बसपा सारकी गजाल मुखार आयली. नेण्टे पिरायेचे चलयेन आपसो मोगी मुकुल सिंह वांगडा कट करून बापूय आनी भाव हांचो खून केल्लो. सीसीटीव्ही फुटेजींतल्यान पुलिसांक ही म्हायती मेळ्ळी. तातूंत मरण आयिल्ल्या राजकुमार हांची धूव दुबावीता वांगडा भोंवतना दिसली. दुबावीत मुकुल सद्या पुलिसांक सांपडूंक ना. मात ते नेण्टे चलयेक हरिद्वार पुलिसांनी ताब्यांत घेतल्या.
ह्या प्रकरणां विशीं…
१५ मार्चाक जबलपूर सिव्हिल लायन वाठारांतले रेल्वेचे मिलेनियम कॉलनींत रावपी राजकुमार विश्वकर्मा आनी तांच्या चल्याचो खून जालो. राजकुमार हांची रगतांत भरिल्ली कूड रांदचे कुडींत पॉलिथिनाचे पोतयेंत सांपडिल्ली. जाल्यार पुताची कूड फ्रिजांत मेळिल्ली. पुलिसांक हे विशींची म्हायती राजकुमार हांच्या भावान दिली. राजकुमाराचे धुवेन राजकुमारच्या भावाक मेसेज करून मुकुल सिंहानूच बापायचो आनी भावाचो धून केल्ल्याचें सांगिल्लें. हे घडणुकेचे सुरवातेक नेण्टे चलयेचें मुकुलान अपहरण केल्ल्याचो दुबाव पुलिसांक आशिल्लो. मात, सीसीटीव्ही फुटेजा वरवीं खरें कितें तें मुखार आयलें.
हे जोडपें फाटल्या २ म्हयन्यां सावन पुलिसांक फटयतालें. केन्ना बंगळुरू केन्ना गोंयांत जाल्यार केन्ना मथुरा हें जोडपें दिसलें. मात, तांचें फायनल लोकेशन नेपाळाक दिसता. मुकुल सिंह आतां भारत सोडून नेपाळच्या दिकेन गेल्ल्याची शक्यताय पुलिसांनी उक्तायल्या. ताका लागून भारत- नेपाळ शिमेर सादूरताय वाडयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
