भांगरभूंय | प्रतिनिधी
निश्पाप, तरणाट्या लोकांचे जीव वचत आसात. लोकांनी सदांच सादूर रावपाक जाय. उजो, वीज, उदका कडेन फकांडां करपाक जायना. अशे अपघात, दुर्घटना टाळपा खातीर ठोस राश्ट्रीय धोरण आपणावचें पडटलें.
फाटल्या सप्तकांत देशभरांत बरेच अपघात, दुर्घटना घडल्यो. व्हड प्रमाणांत जीव गेले. मालमत्तेचें लुकसाण जालें. देशाचें हें लुकसाण. महाराष्ट्रांत घाटकोपरांत वादळी वाऱ्याक लागून कोसळिल्ल्या अनधिकृत जायरात होर्डिंगान 14 जाणांचो जीव घेतलो आनी 65 परस चड जाण गंभीर जखमी जाले. उपरांत पुण्यां अपघात जालो. तो देशभरांत गाजलो. पुण्याच्या कल्याणनगरांत गिरेस्त बापायच्या तवनास पुतान सोऱ्याच्या नेटार अडेज कोटी रुपयांची आलिशान पोर्श गाडी दोनशेचे स्पीडीन व्हरून एका तरणाट्या जोडप्याक निर्दयपणान चिडिल्लें. दोगांय आक्ताक सोंपलीं. आपल्या पुताचीं पातकां धुंवपाक आनी ताका वाचोवपाक ताचो बापूय जो बिल्डर आसा, तो मागीर पयशांच्या आदारान पुराय वेवस्था वांकयता. तोच न्हय तर ताचो आजोय ड्रायव्हराक मुखार काडून नातवाक वाटावपाचो यत्न करता. दोग दोतोर बोगस अहवाल दितात. जुवीज ख्यास्त म्हूण निबंद बरोवपाक सांगता. आमदार थंय धांवून वता…… पूण जागृत नागरिकांक आनी सोशल मिडियाक लागून तांच्या वायट कर्तुबांचे पड्डो पडलो ना. ह्या गिरेस्त कुटुंबान सरकारी प्रशासन आपूण पयशांच्या नेटार कांय न्हय करून बागोवपाक शकतां, हें सिद्द करून दाखयलें. प्रशासनाचीं, वेवस्थेचीं बोंदरां ताका लागून उक्तडार पडलीं.
पुण्यांतल्या ह्या अपघाताची चर्चा चालू आसतना डोंबिवलींतल्या एका निवासी वाठारांतल्या रसायनीक कंपनींत उजो लागलो आनी इकरा जाणांक उज्यान लासून मरण आयलें. कितलेशेच जखमी जाले. हे काळजाक घाय दिवपी घडणुके उपरांत उजणी धरणांत बोट बुडून एकाच कुटुंबांतले स लोक बुडले, पुराय कुटुंब ना जालें. अहमदनगरांतल्या तळ्यांत व्हांवपी मनशाक सोडवपाक गेल्ली सुरक्षा दळांची बोट अपघाताक लागून बुडली आनी कांय जवान आनी थळावे नागरिकांक मरण आयलें.
गुजरातांतल्या राजकोटांत गेमींग झोनांत उजो लागलो आनी 32 परस चड लोकांक मरण आयलें. तातूंत चडशे भुरगे आशिल्ले. देशाचे अर्थीक राजधानींतल्यान सुरू जाल्ली अपघातांची माळ देशाची राजधानी दिल्लीक पावली. दिल्लींतल्या भुरग्यांच्या हॉस्पिटलांत उजो लागलो आनी तातूंत स अर्भकांक मरण आयलें. गोंयांत ट्रकान चवगांक चिड्डून मारले. तर चिरेखण, कानालांत दोगां भुरग्यांक मरण आयलें.
एका फाटल्यान एक घडपी हे अपघात लोकांक हालोवंक लागल्यात. हे अपघात जरी सैमीक दिसतात तरी हे अपघात मनशांचेच आसतात आनी बळी पडिल्ले निरपराध नागरीक दुर्लक्ष आनी बेपर्वायेक बळी पडटात. तातूंत तांची चूक आसता वा कांय वेळार दुर्घटनेक जापसालदार थारिल्ल्या मनशाची. दर एका अपघाताचो पुराय अभ्यास केल्यार हे सगळे अपघात मनशाचे चुकीक वा आडनदरेक लागून जाल्यात अशें दिसून येता. होर्डिंग अपघात आसूं वा पुणेंची घडणूक, दोनूय भ्रश्ट, सुस्त वेवस्थेक लागून घडल्यात, दोनूय घडणुकांच्या गुन्यांवकारांक खर ख्यास्त दिवपाक जाय. गुन्यांवकारांचेर खूनाची केस नोंद करची. बोटी उमथुपाचे अपघात हे आडनदर केल्ल्यान जाल्यात. डोंबिवली, राजकोट आनी दिल्ली हांगा उजो लागपाचे अपघात मनशाची चूक आनी वेवस्थेंतल्या दुर्लक्षाक लागून जाल्यात. सुस्त, भ्रश्ट वेवस्था आनी नागरिकांचीं निश्काळजी, बेपर्वाय हाका लागून जावपी हे अपघात, दुर्घटना आमकां परवडपाच्यो नात. हातूंत निश्पाप, तरणाट्या लोकांचे जीव वचत आसात. लोकांनी सदांच सादूर रावपाक जाय. उजो, वीज, उदका कडेन फकांडां करपाक जायना. अशे अपघात, दुर्घटना टाळपा खातीर ठोस राश्ट्रीय धोरण आपणावचें पडटलें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
