भांगरभूंय | प्रतिनिधी
सोकपीठ टांकी भरून उदक व्हांवता उक्तडार
म्हापशें: पुलीस स्टेशनांतलें सोकपीठ टांकी भरून घाण उदक उक्तडार व्हांवता. हाचो परिणाम पुलीस स्टेशनाच्या प्राकारांत घाणीचें साम्राज्य पातळ्ळां.
म्हापशें पुलीस स्टेशन इमारत उबारतना सल्लागार तज्ञां कडल्यान फक्त 2 बाय 2 मिटर तांकीच्या सोकपीठ टांकयेची वेवस्था केल्ली. इतल्या व्हड इमारती खातीर केल्लें हें नियोजन उणें पडटा. हाका लागून सेगीत हें सोकपीठ भरून तातूंतलें घाण उदक उक्तडार व्हांवता आनी सगली कडेन घाण पातळटा.
ही टांकी भरून व्हांवत आशिल्ल्याचो प्रकार पुलीस अधिकाऱ्यां कडल्यान भौशीक खात्याक पत्र धाडून नदरेक हाडून दिला. पूण दर फावटी प्रमाण भौशीक बांदकाम खात्यान वेळ काडपाचोच प्रकार चलयला.
ह्या सोकपिठा कुशिकूच पुलीस कॅण्टीन आसा. हांगा च्या, नाश्तो आनी जेवणा वेळार पुलीस कर्मचाऱ्यांक ह्या घाण उदकाचे दुर्गंधीचो त्रास सोंसचो पडटा. भौशीक बांदकाम खात्यान ही घाण उदकाची टांकी रोखडीच रिती करची अशी मागणी पुलिसांची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
