भांगरभूंय | प्रतिनिधी
लुकसाण भरपाय दिवपाची आरजी कार्यकर्त्यांची मागणी
फोंडें: दुर्भाट पंचायत वाठारांतल्या कांय वाठारांनी सोमारा रातीं सात वरांच्या सुमाराक अचकीत विजेचो दाब वाडिल्ल्यान खूबशा जाणांच्या घरांतलीं लायटी वेलीं उपकरणां लासून गेलीं. टीव्ही, फ्रीज, मोबायल, एसी आनी हेर उपकरणां लासून गेल्ल्यान वाठारांतल्या लोकांक लाखांनी रुपयांचें लुकसाण जालें. वीज मंत्री सुदिन ढवळीकार हांणी लुकसाण जाल्ल्यांक भरपाय दिवची अशी मागणी आरजी कार्यकर्त्यांनी केल्या.
सोमारा रातीं सगल्या घरांतली लायटी वेलीं उपकरणां सुरू आसतना अचकीत विजेचो दाब वाडलो. ताका लागून खूबशा लोकांच्या घरांतलीं उपकरणां लासून गेलीं. मंगळारा सकाळीं आरजी कार्यकर्त्यांनी 14 ग्रामस्थांच्यो सयो घेवन वीज खात्याचे कचेरेंत निवेदन सादर केलें. लुकसाण जाल्ल्या लोकांक वीज मंत्र्यांनी लुकसाण भरपाय दिवपाची मागणी निवेदनांतल्यान केल्या.
अदीक म्हायती दितना विश्वेश नायक हांणी सांगलें, सोमारा रातीं अचकीत विजेचो दाब वाडिल्ल्यान लोकांक लुकसाण सोंसचे पडलें. मंत्र्याचें वाठारांत लक्ष नाशिल्ल्यान अश्यो घडणुको सेगीत घडत आसात. कांय म्हयन्यां पयलीं जिवी वीज वाहिनी पडून गोरवांक मरण आयिल्लें. ताका लागून वीज खात्याचो वेव्हार वेवस्थीत जायत नाशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
