भांगरभूंय | प्रतिनिधी
कर्कश आवाजाक लागून लोकांक त्रास जायत आशिल्ल्याच्यो कागाळी
फोंडें: फोंडें वाठारांत मॉडिफायड केल्ल्या दुचाकींची संख्या वाडत आसा. आयतारा आनी सुटयेच्या दिसांनी दुचाक्यांच्या कर्कश आवाजाक लागून लोकांक त्रास जायत आशिल्ल्याच्यो कागाळी वाडत आसात. कुट्टी उड्डाण पुलार रातच्या वेळार खूबश्यो मॉडिफायड केल्ल्या दुचाकींची रेस लागत आशिल्ल्यान पुलिसांनी अपघात आडावपा खातीर खर कारवाय करपाची मागणी लोकां कडल्यान जायत आसा.
कुट्टी हांगा फाटल्या बिरेस्तारा केटीएम ह्या दुचाकी वयलो ताबो सुटिल्ल्यान वीज खांब्याक धपको बसून तरणाट्याक जाग्यारूच मरण आयिल्लें. अपघातांत सांपडिल्ली केटीएम ह्या दुचाकीच्या मुखा वेल्या भागाचो चुरो जाल्लो. ताचे वेल्यान दुचाकीची स्पीड कळून येता. अती गतीन धांवपी वाहनांचें आकर्शण तरणाट्यांक आसा. ताका लागून रातच्या वेळार रेसी सारके प्रकार घडत आसतात. कुट्टी उड्डाण पुलार रातच्या वेळार व्हड प्रमाणांत मॉडिफायड केल्ल्यां दुचाकी घेवन रेस लावपाची तरणाट्यांची टोळी कार्यरत आसा. हाचे पयलीं रेसीक लागून उड्डाण पुलार अपघात जावन तरणाटे जखमी जावपाचे प्रकार घडल्यात.
आयतारा आनी हेर सुटयेच्या दिसांनी फोंडें शारांत कर्कश आवाजाच्यो दुचाकी लोकां खातीर तकलीफोड थारल्यात. तरणाटे दुचाकी मॉडिफायड करपा खातीर हजारांनी रुपया खर्च करीत आसतात. ताचे वेल्यान पालक भुरग्यांक पयशे मागले उपरांत सहजतायेन दीत आशिल्ल्याचें दिसून येता. पूण एखादो अपघात घडले उपरांत पालक मात सरकाराक वा हेर वाहन चालकाक दोश दीत आसतात. मॉडिफायड केल्ल्या दुचाकी चालकां आड पुलिसांनी तशेंच येरादारी खात्यान खर कारवाय करपाची मागणी लोकां कडल्यान जायत आसा.
फोंडें वाठारांत अदमाशेक 15 ते 25 पिराये गटांतलीं कांय भुरगीं केटीएम वा ड्युक्स सारक्यो दुचाकी घेवन भोंवतना दिसून येतात. ताका लागून अपघातांत ह्याच पिरायेंतल्या भुरग्यांक मरण येत आशिल्ल्याचें तपासणेंत दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
