भांगरभूंय | प्रतिनिधी
स्वताच्या खर्चान 20 घरांक दिले पत्र्याचे शिट्स; पंचायतीचें अभिनंदन
दिवचल: न्हावेली-सांखळे वादळान पाखें हुबून गेल्ल्या सुमार 20 घरांक ताकतिकेची मजत म्हूण मुख्यमंत्री डॉ. प्रमोद सावंत हांणी स्वताच्या खर्चान पत्र्याचे शिट्स उपलब्ध करून दिले. ताकतिकेन पावसा पसून संरक्षण करपा खातीर ही मुळावी मजत उपलब्ध करून दिल्या.
ह्या वादळांत खूबशा घरांचें, बागायतीचें तशेंच वीज खात्याचें व्हड लुकसाण जालां. हो आंकडो सुमार एक कोटीचो आसा.
ह्या वादळांत सुमार 20 कुटुंबांच्या घरांचे पाखें हुबून गेल्ल्यान तांचेर मोटें संकश्ट आयिल्लें. मुख्यमंत्र्यांनी वादळग्रस्तांची विचारपूस करून सगले कडेन प्रत्यक्ष भेट दिवन पळोवणी केल्ली.
मंगळारा डॉ. प्रमोद सावंत हांणी ज्या घरांचें पाखें हुबून गेलां त्या घरां खातीर ताकतिकेन गरजे प्रमाण शिट्स उपलब्ध करून दिल्ल्यान मुळाव्या पांवड्यार तांकां थाकाय मेळ्ळ्या.
न्हावेली हांगासरल्या खूबशा कुटुंबांक वादळाचो फटको बसलो. तांकां थाकाय दिवप हें म्हजें कर्तव्य. सुरवातेक तांच्या पाख्यांक आच्छादन मेळचें हे खातीर ही ल्हानशी मजत आनी सहकार्य दिलां. आपत्कालीन नियंत्रण यंत्रणा मुख्यमंत्री सहाय्य निधी आनी हेर माध्यमांतल्यान सगल्यांक गरजेची ती मजत पुरोवपा खातीर आपली फाटपुरवण सुरू आसून सगल्यांनी आवश्यक ही प्रक्रिया पुराय करची अशें आवाहन मुख्यमंत्री डॉ. प्रमोद सावंत हांणी ह्या वेळार केलें.
ह्या वेळार सरपंच कालिदास गांवस, पंचायतीचे पंच वांगडी, भारतीय जनता पक्षाचे मंडळ अध्यक्ष गोपाळ सुर्लकार, कार्यकर्ते आनी ग्रामस्थ हाजीर आशिल्ले.
ह्या वेळार पंचायती वतीन कालिदास गांवस, पंचायत वांगड्यांनी मुख्यमंत्री डॉ. प्रमोद सावंत हांचें विशेश अभिनंदन केलें. ह्या वेळार सुलक्षणा सावंत हाजीर आशिल्ल्यो.
मुख्यमंत्री डॉ. प्रमोद सावंत समाजीक जिव्हाळो जपपी आनी दरेक प्रसंगाक लोकांक मजत करपी अशे सेवा दूत आसात. वादळांत आडकल्ल्या लोकांक मजतीचो हात दिवपा खातीर डॉ. सावंत हांणी ताकतिकेन पत्र्याचे शिट्स दिवन मुळावी थाकाय दिल्ले खातीर तांणी मुख्यमंत्र्याचे अभिनंदन केलें तशेंच विशेश उपकार आठयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
