भांगरभूंय | प्रतिनिधी
सेगीत 69 ग्रॅण्ड स्लॅम सर्तींनी खेळून विक्रम करपी फ्रान्साची पयल्या क्रमांकाची बायल खेळगडी अॅलीझ कॉर्नेटो हिणें फ्रॅंच ओपनाचे पयले फेरयेंत हारल्या उपरांत खेळाक आदेवश केलो.
कोर्नेटोक पयले फेरयेंत सातव्या सिडा वयले चीनाचे झेंग क्विनवेन हिणें 6-2 आनी 6-1 अशा सरळ सेटांनी हारयली. फ्रान्साची 34 वर्सां पिरायेची खेळगडी कॉर्नेटोन सर्ती खातीर वायल्ड कार्ड वरवीं प्रवेश दिल्लो. ही आपली अखेरची सर्त आसतली अशें तिणें पयलींच जाहीर केल्लें.
तिणें 2007तले ऑस्ट्रेलियन ओपना सावन अंदूं फ्रॅंच ओपना मेरेन दरेक ग्रॅण्ड स्लॅम सर्तींनी वांटो घेतिल्लो. पूण, तिका एकदा लेगीत क्वॉर्टर फायनलीच्या मुखार पावपाक शक्य जालें ना.
मजगतीं, क्ले कोर्टाचो बादशा राफायल नादालाक दादल्यांच्या एकोड्या गटांतले पयले फेरयेंत हार घेवची पडली. ताणें दुखापती उपरांत पुनरागमन केल्लें. ताका चवथ्या सिडा वयल्या अलेक्झॅण्डर झ्वेरेवान 6-3, 7-6 (7-5) आनी 6-3 अशा सरळ सेटांनी हारयलो.
नादालान फ्रॅंच ओपन विक्रमी 14 खेपे जिखल्या. दुखापतीक लागून ताणें पोरूं वांटो घेवंक नाशिल्लो.
नादाला खातीर ही लडत सोंपी आसची ना हें आदींच स्पश्ट जाल्लें. हे सर्तींत बादशा भशेन वावरुपी नादालाचो काल आत्मविस्वास उणो जाल्लो दिसलो. पयलो सेट सहज व्हगडायलो आसलो तरी ह्या कोर्टाचेर असो फाटीं पडून लेगीत ताणें साबार मॅची जिखल्यात आनी वस्तादपण लेगीत मेळयलां.
दुसऱ्या सेटांत ताणें आपलो सगलो अणभव पणाक लायलो. 5-5 अशी बरोबरी सादून ताणें सेट सेट टायब्रेकरांत व्हेलो. पूण, थंय ताचो प्रतिकार मात्सो उणो पडलो. ते उपरांत नादाल फाटीं पडत गेलो.
नादाला परस झ्वेरेवान पयले सर्व्हिसाचेर बरें नियंत्रण दवरलें. ताचे पयले आनी दुसरे सर्व्हिसेचो वेगूय चड आशिल्लो. तशेंच ब्रेक पॉयण्टाचें रुपांतर येसांत करपाक तो 33%: 18% असो मुखार लेगीत आशिल्लो. ताचे विनर्स लेगीत 44ः33 अशें आशिल्लें. पूण, नादालाचे मैदानी शॉर्ट जबरदस्त आशिल्ले. पूण, ताचे हे शॉर्ट ताका जैत मेळोवन दिवपाक फावोशें नाशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
