भांगरभूंय | प्रतिनिधी
पणजी, प्रतिनिधी : मिरामार शारदा मंदिरा लागसारा आशिल्लो मोडपाक पाविल्लो पांयपूल पणजे महानगर पालिकेन लोकां खातीर बंद केला. पुलाची चाचणी जातली. अहवाल आयले उपरांतूच ह्या पुला विशीं फुडलो निर्णय महानगरपालिका घेतली.
मिरामार पांयपुलाचे पत्रे कोसळून पुलाक बुराक पडिल्ले देखून तो वापरपी लोकांक आनी रस्त्यावेले येरादारीक धोको निर्माण जाल्लो. वांगडा मुंबय उटांगराच्या पावसांत एक होर्डिंग पडून मरण पाविल्ले घडणुकेची दखल घेवन मिरामारचो हो कळमेल्ल्या पांयपूला विशीं पावलां उबारचीं अशें शारदा मंदीर स्कुलान पणजे महानगरपालिकेंक पत्र बरयल्लें.
हो पुल मिरामार दर्यांक तेंकून आसा देखून चक्रिवादळ जायत जाल्यार ताचो फटको ह्या पुलार बसपाक शकता. देखून ह्या विशयाचेर गंभीर लक्ष दिवन हो विषय प्राधान्यान सोडवचो, अशें शारदा मंदीरान महानगरपालिकेक कळयल्लें.
ही बातमी भांगरभूंयन उजवाडाक हाडिल्ली. हाची दखल घेवन पणजे महानगरपालिकेन ह्या पुलाची दोनय वटेनची वाट लोकां खातीर बंद करून उडयली.
पालिकेच्या कर्मचार्यांनी दोनय वटेन पत्रे लावन थंयसर वॅल्डींग मारलां देखून ह्या पुलार वचप सामकेंच धोक्याचें आसा. लोक ह्या पुलाचो वापर करिच नाशिल्ले. मात, कांय जाण ह्या पुलार सोर्याची पार्टी करताले. जाल्यार तवनाशी भुरगे पुला वयर चडून धुमशेणां घालताले. देखून कसलीच दुर्घटना जावची न्हय म्हणून हो पुल बंद केला.
महानगरपालीकेन ऑगस्ट २०२३ त गोंय अभियांत्रिकी महाविद्यालयाक ह्या पुलाची पळोवणी करून ताचे स्ट्रक्चरल स्टॅबिलिटी ऑडीट करपाक पत्र बरयल्लें. मात फाटले णव म्हयने जाले महाविद्याल्यान कसलीच जाप दिवंक ना.
मंगळारा परत एक फावट महानगरपालिकेन गोंय आभियांत्रिकी महाविद्यालयांक उगडास करून दिला आनी बेगीन मिरामारच्या ह्या पांयपुलाची पळोवणी करपाक सांगलां. पळोवणे खातीर महाविद्यालयाचे प्राध्यापक के जी गुप्ता आनी
तांचो पगंड धाडपाची विनवणी पालिकेन केल्या. आमी सात दिसांभितर स्ट्रक्चरल स्टॅबिलिटी ऑडीट अहवाल मागला. अवहाल आयले उपरांतूच पुल मोडप काय ना हो निर्णय घेतले, अशी म्हायती महानगरपालिकेच्या अधिकार्यांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
