भांगरभूंय | प्रतिनिधी
दक्षीण गोंयांत १०६ चिरेखणी आशिल्ल्याची नोंद
पणजी, प्रतिनिधी : प्रतिबंदात्मक उपाय येवजण्यो करपा खातीर चिरेखणींचो तशेंच हेर खणींचो सोद घेवपाची जापसालदारी जिल्होधिकार्यांनी मामेलदारांचेर सोपयल्या. चिरेखणींचें ठिकाण आनी म्हायती मेळ्ळ्या उपरांत सरयांचें वंय (फेंसींग) करपा विशींचो आराखडो भौशीक बांधकाम खात्या वरवीं जातलो, अशी म्हायती अधिकार्यांनी दिली.
नानोडा – दिवचले चिरेखणींत बुडून दोगां तरणाट्यांक मरण आयले उपरांत चिरेखणी सुरक्षीत नाशिल्ल्याचें सिद्द जालां. गांवगिर्या वाठारांनी बरेच कडेन चिरेखणी आसात. पावसांत ह्या चिरेखणींनी उदक भरता. तरणाटे तशेंच ल्हान भुरगींय बेधडक चिरेखणींनी पेंवपा खातीर देंवतात. बुडून मरपाच्या घडणुकांनी वाड जाल्ल्यान सरकारान घसघशे, तळीं तशेंच चिरेखणींचेर पेंवपाक बंदी घाल्या.
तळीं तशेंच घसघशे फामाद आशिल्ल्यान तांची म्हायती प्रशासना कडेन आसा. चिरेखणींची मात म्हायती ना. दक्षीण गोंयांत १०६ चिरेखणी आशिल्ल्याची नोंद आसा. चिरेखणींचो सोद घेवन तांच्या थळांची म्हायती दिवपाक मामलेदारांक सांगलां. मामलेदारां कडल्यान म्हायती मेळ्ळे उपरांत चिरेखणी खंय आसात तें कळपाक मजत जातली, अशी म्हायती दक्षीण गोंयचे जिल्होधिकारी आश्विन चंद्र हांणी दिली.
चिरेखणींची म्हायती मेळ्ळे उपरांत भौशीक बांधकाम खात्यावरवीं वंय (फेंसींग) घालपा विशीं आराखडो तयार जातलो. आचारसंहिता सोपले उपरांतूच प्रतिबंदात्मक उपायांचो आराखडो तयार करप शक्य जातलें, अशें तांणी सांगलें.
उत्तर गोंयांतूय जिल्होधिकारी कार्यालयान चिरेखणी/ खणींचो सोद घेवपाच्यो सुचोवण्यो मामलेदारांक केल्यात. उत्तर गोंयांतल्या चिरेखणींचो आंकडो मात जिल्होधिकार्यां कडेन उपलब्ध नासलो. उत्तर गोंयांतूय शंभरां वयर चिरेखणी/खणी आसपाक जाय, अशी म्हायती एका अधिकार्यान दिली.
घसघशे, तळीं हांचे कुशीक गर्दी आसता. चिरेखणीं रानां वाठारांत आशिल्ल्यान बर्याच जाणांक तांची म्हायती नासता. हाका लागून चिरेखणींत देंवपाक मेळचे न्हय, म्हूण प्रतिबंदात्मक उपाय येवजण्यो करपाचेर भर दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
