भांगरभूंय | प्रतिनिधी
मलेशिया, खबरां संस्था: आमच्यां मदले जायते जाण दोळ्यांत कितेंय पडल्यार दोळे चोळटात. सहज मुखामळा वयल्यान हात भोंवडायतना आमी दोळे चोळटात. केन्ना केन्नाय कांय जाण बरोच वेळ दोळे चोळटना दिसतात. दोळे घांसल्यार तात्पुरती सुटका मेळटा आनी दोळ्यांची खाज येवपा पसून सुटका मेळटा. पूण दोळे चोळपाचे वायट परिणाम खूब गंभीर आसतात. मलेशियाच्या २१ वर्सां पिरायेच्या चल्याक दोळे चोळप पडलें म्हारग. ह्या तरणाट्याक परत परत दोळे चोळपाची संवय आशिल्ली. ताचे संवयेक लागून ताच्या दोळ्यांतलीं रेटिना इबाडिल्ल्यान ताका रेटिना बदलपा खातीर शस्त्रक्रिया करची पडली.
अशें नेमकें कोणा वांगडा घडलें?
ज्या तरणाट्या वांगडा ही घडणूक घडली ताचें नांव मोहम्मद झाबिदी. भुरगेपणा सावन झाबिदीक जायत्या गजालींची एलर्जी आशिल्ली. जायते फावटीं तो दोळे तांबडे जायसर दोळे चोळटालो. उपरांत ताच्या दोळ्यांचे भलायके संबंदी समस्या निर्माण जाल्यो. पिरायेच्या १५ व्या वर्सा झाबीदीच्या उजव्या दोळ्यांची नदर उणी जावपाक लागली. व्हड जातकच ताच्या उजव्या दोळ्याची नदर उणी जायत गेली.
कांय दीस दोळे बंद दवरचे पडटले
झाबिदीची रेटिना बदलपाची शस्त्रक्रिया येसस्वी जाल्या. झाबिदीची इबाडिल्ली रेटिना काडून ताचे सुवातेर नवी रेटिना घाल्या. आतां आपली स्थिती बरी आसा अशें झाबीदीन सांगलें आनी कांय दीस उजवो दोळो पुरायपणान बंद दवरचो पडटलो अशेंय तांणी सांगलें. दोळे चोळ्ळ्यार दोळ्यांक तात्पुरती सुटका मेळूं येता, मात ताचे परिणाम आयुश्यभर भोगचे पडटात.
दोळे कित्याक चोळचे न्हय हाचीं पांच कारणां:
-सेगीत दोळे चोळिल्ल्यान दोळे चुरचुरप, दुखप अश्यो समस्या निर्माण जातात.
-सेगीत दोळे चोळिल्ल्यान बॅक्टेरिया आनी विशाणूंचे वायट परिणाम जावपाची शक्यताय वाडटा.
-दोळ्यांत वोलसाण तिगोवन दवरपी स्नायूंक दुखापत जावन गंभीर परिणाम भोगचे पडूं येतात.
-दोळ्यांनी रगत सांठिल्ल्यान दोळे तांबडेच जावपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
