भांगरभूंय | प्रतिनिधी
पणजी : राज्यांत अंदूच्या मान्सून हंगामांत (जून ते सप्टेंबर) सरासरी परस चड पावस पडपाची शक्यताय हवामान खात्यान उक्तायल्या. खात्या वतीन जारी केल्ल्या दुसर्या टप्प्यांतल्या अदमासांतल्यान अशें कळून आयलां. आदल्या अदमासांतूय हीच शक्यताय उक्तायल्ली.
देशभरांत मान्सून १०६ टक्के आसपाक शकता असो अदमास हवामान खात्यान उक्तायला. जून ते सप्टेंबर मजगतींच्या ह्या अदमासांत ५ टक्क्यांचो फरक आसूं येता. मान्सून केरळांत ३१ मे मेरेन दाखल जावपाची शक्यताय आसा. ते प्रमाण मान्सून राज्यांत ४ वा ५ जुनाक पावपाक शकता.
राज्यांत २०२३त मान्सून काळांत ३४१४.३ मिलिमीटर पावसाची नोंद जाल्ली. २०२२त सरासरी परस १० टक्के उणो म्हणजे २७२० मिलिमीटर पावसाची नोंद जाल्ली. जाल्यार २०२१त ३१५६ मिमी, २०२०त ४२०३ मिमी पावसाची नोंद जाल्ली.
जून म्हयन्यांत पावस, उश्णताय चड
खात्याच्या अंदाजा प्रमाण राज्यांत जून म्हयन्यांत सरासरी परस चड पावस पडण्याची शक्यता आसा. मजगतीं राज्यांतलो चडांत चड तापमान सामान्य तापमना परस चड उरतलो.
राज्यांत ३ जून मेरेन पावसाची शक्यताय
खात्यान राज्यांत २८ मे ते ३ जून मजगतीं मध्यम ते आडवेळो पावस पडपाची शक्यताय उक्तायल्या. मंगळारा पणजे चडांत चड ३३.९ अंश सेल्सिअस तापमानाची नोंद जाली. फुडले सात दीस चडांत चड तापमान ३४ अंश सेल्सिअस मेरेन उरपाची शक्यताय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
