भांगरभूंय | प्रतिनिधी
विजेचें कितें जालां, केन्ना येतली, कितलो वेळ लागतलो? आनीक अशे फोन करून वीज खात्याक सतावचे परस बॅटरीचो दिवो घेवन तांकां मजत करूंक भायर सरचें आनी स्वताच पळोवचें ते आमचे खातीर कितले धडपडटात ते…!
आमकां दिसता की पावसाचें आनी विजेचें वेगळेंच अशें नातें आसता. जायतें फावट आमी पळयतात की पावस येवपाक लागलो रे लागलो वीज वता! मागीर आमी पावसाक, विजेक आनी वीज खात्याकूय गाळी घालतात. (हे लायटीक आनी आतांच मरूंक जाय आसलें? पाड पडलें हे लायटीचें अशें म्हणटात) पूण खुबशा जाणांक हें खबरूच ना, की पावस आयलो की वीज कित्याक वता ती… खरें म्हणल्यार ती वीज वचना… वीज खाते ती स्वताच बंद करता. दुर्घटना जावची न्हय म्हणून. तांकां लोकांची काळजी आसता, लोकांची काळजी करप हें तांचें कर्तव्य आसता आनी तें ते बरें तरेन पाळटात. पूण आमी मात तांकां गाळीच संवतात. आमी जितली वीज वापरतात तितलेच पयशे आमी फारीक करतात. जाल्यार जेन्ना वीज वता तेन्ना तांकां गाळी घालपाचो आमकां कांयच अधिकार ना.
वीज कर्मचारी दीस रात काम करून आमकां बरी सेवा दितात, केदेय राती वीज गेल्यार ते रोखडेच खंय चूक जाल्या ती सोदून दुरुस्त करतात. अशा वेळार तांकां कांय जाणाक आपलो जीव पासून वगडावचो पडटा. वीज कर्मचार्याच्या बर्या कर्मान आमकां घरात उजवाडांत रावूक मेळटात. ते आपल्यो राती जागोवन आमकां सुस्त न्हिदयतात. केन्नाय चुकून वीज वता तेन्ना पयलो आकांत तांचेर येता. वीज दुरुस्त जायसर तांकां तारो आसना, तातूंतच फोनार फोन वाजूंक लागतात. वीज केन्ना येतली…? कितलो वेळ लागतलो…? ती कित्याक गेली..? अशें कितलेशेंच प्रस्न फोना वयल्यान. थोड्यांची वायट उतरांय आयकुपाक पडटा. तेन्ना निरुपायान तांकां फोन बंद करून दवरचो पडटा.
जेन्ना रातच्या वेळार वीज वता तेन्ना मनशान तीन उपाय करचे.
* पयलो उपाय : वीज खात्याक गाळी घालचे परस आपल्या घरांतली वात वा तेलाचो दिवो पेटोवचो. जेणें करून घरांत थोडो तरी उजवाड जातलो.
* दुसरो उपाय : वीज वताच आपल्या घरांतल्यो विजेचेर चलपी किमती वस्तू फ्रिज, टिवी, एसी बी बंद करचो. ताचो विजवाहक केबल विजे पासून कुशीक करचो. जेन्ना वीज येता तेन्ना दोबराद पावर जावन वस्तू लासपाचो भंय आसता.
* तिसरो उपाय : विजेचें कितें जालां, केन्ना येतली, कितलो वेळ लागतलो? आनीक अशे फोन करून वीज खात्याक सतावचे परस बॅटरीचो दिवो घेवन तांकां मजत करूंक भायर सरचें आनी स्वताच पळोवचें ते आमचे खातीर कितले धडपडटात ते…!
– अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
