भांगरभूंय | प्रतिनिधी
आतां तरणाट्यांनी ह्या सगल्या गजालींचेर नदर दवरची पडटली. जाल्यारूच ताचो लाव आमकां गोंयकारांक मेळपाक शकता, नाजाल्यार भायले येवन भाटकार जाले असो जप करीत बसले, म्हूण कांय जावपाचें ना.
कसलेंय जावं आमी काम करपांक तयार आसात, पुण आमकां घेवपाची तयारी तरी तुमी दाखयात, अशें म्हणपाचे दीस आतां गोंयांतूच आयल्यात. ‘सरकारी कामांची आशा सोडली, पुण खाजगी कंपनींनी तरी संद दियात रे बाबा. म्हजो पुत शिकून बेकार आसा. सरकारी काम करून घेवपाक आमदारांच्या फाटल्यांन भोवून जालें, पुण पयशे भरून काम करपाची आमची तांक ना. प्रायव्हेटान तरी खंय तरी जाता जाल्यार पळयात रे बाबा. लोकाचें काम करून, कश्ट करून भुरग्यांक शिकयले नोकरेचे आशेन, पुण काय फायदो ना. शाळेंत पयलो नंबर घेतालो. सरकारी परिक्षांनी फेल जाता. पोराचीं वर्सां जायत आयलीं, पुण शिकून सवरून घरा बेकार. आनी वांगडाचे फेल जावपी सरकारी नोकरेंत…’ खऱ्या गोंयकारांचो हो आवाज. पूण तो पावपाक जाय ताचे कडेन मात केन्नाच पावना. तशेंय बी आमचें सामान्य गोंयकारांचें कोणाक पडून गेलां. आमच्या गोंयांत कांय दिसांनी आमीच उरपाचे नात, खंयची नोकरी मागीर….
गोंयात चलपी फार्मा कंपनींनी गोंया भायर वचून नोकभरती करपाचो विचार केले उपरात गोंयांत बरोच बोवाळ जालो. विरोधकांनी सरकाराक सोलून काडलो, ताचे उपरांत त्या कंपनींक भायर दवरिल्ल्यो मुलाखती रद्द करच्यो पडल्यो. आतां बोवाळ करपी कोण आशिल्ले जाल्यार ते विरोध पक्ष आनी आमदार. तांकां काय खाजगी नोकऱ्यो नाकात. नोकऱ्यो जाय गोंयकारांक, जाल्यार जांकां नोकऱ्यो जाय ते खंय आसात तर? एकलोय फुडें येवन कित्याक उलयना? खरें म्हणल्यार तांकांय त्यो ‘खाजगी’ नोकऱ्यो नाकाच. आमचे आमदार, मंत्र्यांनी पसून हें कितलेशेंच फावट सांगलां. मात तेन्ना एकल्यानूय सांगलें ना की ‘बाबा, तुमी सांगतात तें सारकें न्हय, आमकां गोंयांत नोकऱ्यो जाय.’ मागीर आतां गोंया भायर मुलाखती घेवपी कंपनींची कितें चूक? गोंयकारांक सरकारी नोकऱ्यो जाय, तांका खाजगी नोकरी करपाक नाकात. गोंयकार आळशी, तांकां लग्नाक जाव हेर गजालींक मायज सुटयो जाय. ही आमची वळख आमी वेंचून दिल्ल्या राजकारण्यांनीच करून दवरल्या. मागीर कंपनींची चूक कशी म्हणपाक जाता? आनी ही आमची अशी वळख कित्याक काय राजकारण्यांक विचारपाची आमची एकल्याचीय तांक ना. ते परस आमीच वेंचणुकेक तांचो प्रचार करपाक भोवतात.
आतां विरोधकांनी बोवाळ घाले उपरांत कंपनींनी नोकरभरती रद्द केल्या तें बरें आसा. पुण, त्या कंपनींक नोकर जाय, आतां कोणाक घेतले ताचो कोणे विचार केला? भायल्यांक घेवपाक विरोध केलो म्हूण कोणाकूच घेवचे नात अशें जावपांक शकना. कंपनींचें काम जावपाक जाय जाल्यार तांकां नोकर जायच. आनी ते बेगीन घेवपाक जाय तेंवूय खरें. आतां गोंयकार म्हण्टात, भायल्यांक नाका जाल्यार आता कोणांक घेवचे तेंवूय त्या कंपनींक सांगचें पडटलें. भायल्यांक नाका म्हणपाचें धाडस गोंयच्या तरणाट्यांनी केलें ना. तें सोड, पूण आतां त्या कंपनींनी काम करपाची तयारी तरी गोंयच्या तरणाट्यांक दाखोवची पडटली. तेंवूय विरोधी पक्ष आनी आमदार दाखोवपाक शकनात. ना जाल्यार तांकां खुलेपणान काडिल्ल्यो जायराती रद्द करून आतां मुकाट्यांनी भायल्यांक कामार घेवचे पडटले. तेन्ना कोणे आवाज काडपाचो प्रस्नच उरचो ना. ह्या कंपनींनी ज्यो मुलाखती दवरिल्ल्यो तांकां कितले कामगार जाय? कसले जाय? तांचें शिक्षण कितें आसपाक जाय? हाचो सगलो डाटा त्या कंपनीं कडच्यान आतां सरकारान घेवचो आनी गोंयच्या रोजगार विनीमय केंद्रा कडेन नोंद आशिल्ल्या भुरग्यांक संद दिवची. नाजाल्यार फुडल्या दारान ना, पूण फाटल्या दारांन परत तेंच जावपाक जायना.
जेन्ना बेकारीचो विशय येता आनी बेकारीचेर सर्व्हे जातात तेन्ना गोंय बेकारे खातीर सगल्यांच्या माथ्यार आसता. ताचें हेंच तर कारण. गोंयांत खाजगी कंपनींनी लागीं- लागीं 94 हजार कामगांर कामाक आसात. तातूंत 50 टक्क्यां वयर म्हणल्यार 48 हजार बिगर गोंयकार आसात. सरकारान दिल्ल्या आंकड्या वेल्यानूच ही म्हायती उक्तडार आयल्या. आतां हो आंकडो जांचें वेंचणूक पत्र आनी रेशन कार्डाची गोंया भायर नोंद आसा. पूण जे 45 हजार सुमार गोंयकार म्हूण सांगतात, तातूंत आनीक अशे खूप जाण आसात जे गोंया भायले, पूण आतां गोंयकार जाले. आनी आतां 48 हजार जे गोंया भायले म्हणटात तातूंतले 10 हजार तरी काय म्हयन्यांनी गोंयकार जातले. कारण काय आमदार, मंत्र्यांनी लोकसभा वेंचणुके वेळार भायल्यांची मतां कशीं मेळटलीं ताचे आंकडे वेवस्थीत सांगल्यात. आनी हे भायल्यान येवपीच आतां गॅरेंटेट एकल्याचे मतदार. ताच्याच जिवार तर सरळ वेंचणुको लडोवन लीड घेवन जिखपाच्यो गजाली सगलेच राजकारणी करतात.
कंपनींनी काडिल्ली जायरात जर सारकी पळयली जाल्यार लक्षांत येता की त्या कंपनींक अणभवी मनीस बळगें जाय. जें गोंयात मेळपाक शकता काय हो प्रस्न आसा, पुण जर ह्या कंपनींनी आमकां गोंयाकारांक कामूच करपाची संद दिलीना जाल्यार अणभव खंयच्यान मेळटलो? आमचे खातीर सरकारान एप्रेन्टिशीप येवजण चालीक लायल्या खरी पूण खाजगी कंपनींनी ताचो कितलो लाव गोंयाकारांक जातलो तांचेर नजर आता सरकाराकूच दवरची पडटली. जेन्ना खंयचीय कंपनी आपल्या गांवांत आसा जाल्यार तातूंत कसले नोकऱ्यो तयार जावपाक शकतात, ते विशींचें शिक्षण तरणाट्यांक कशे दितले ताच्या विशीं वेगळें धोरण तयार करचें पडटलें. म्हत्वाची गजाल म्हळ्ळ्यार आतां तरणाट्यांनी ह्या सगल्या गजालींचेर नदर दवरची पडटली. जाल्यारूच ताचो लाव आमकां गोंयकारांक मेळपाक शकता, नाजाल्यार भायले येवन भाटकार जाले असो जप करीत बसले, म्हूण कांय जावपाचें ना.
ज्ञानेश्वर वरक
9403541232
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
