भांगरभूंय | प्रतिनिधी
लोकसभा वेंचणुकेची प्रक्रिया चार दिसांत निमाण्या आनी निर्णायक अशा पांवड्यार प्रवेश करीत आसतना, देशांतल्या सर्वसामान्य मतदारां मुखार अशे खूबशे प्रस्न उबे आसात की ताची जाप चार जून उजवाडले बगर मेळची ना. मोदी मॅजीक ह्या वेळारूय चलतली आनी नरेंद्र मोदी हेच हॅट्रीक करतले अशे कोणूय लाख म्हणूं, पूण भाजपाक सहजतायेन येस मेळचें ना अशें म्हणप्यांचीय संख्या उणी ना. ह्या वेळार ‘चारसो पार’ चो नारो जाल्यार आतां मेरेनच्या सगल्याच पांवड्यार मतदारां मुखार दिला. पूण भाजपाची सगली भिस्त मोदी ब्रॅण्डाचेर निंबून आशिल्ल्यान तो चलत जाल्यार कांयच अशक्य ना हाचीय तांकां खात्री आसा. काँग्रेसी सयत आप, समाजवादी, तृणमूल बी पक्षांच्या फुडाऱ्यांकूय आतां कंठ फुटिल्लो दिसूंक लागला. 400 खंयच्यो ह्या वेळार 180 परस चड सुवातो भाजपाक मेळच्यो नात. अशें बरोवन दिवपाची तयारी काँग्रेस फुडारी राहूल गांधी हे एके वटेन दाखयतात, जाल्यार तांचे राष्ट्रीय अध्यक्ष मल्लिकार्जून खरगे भाजप 200 परस मुखार वच्चो ना हाचेर कसलीय पैज लावपाक तयार आसात. प्रियंका वाड्रा गांधी ह्योवूय भाजपाक 180 ते 200 मेरेनूच सुवातो मेळटल्यो अशें सांगत प्रचार करतना दिसतात. जाल्यार तिहार बंदखणींतल्यान 21 दिसांच्या ब्रेकाचेर भायर आयिल्ले दिल्लीचे मुख्यमंत्री अरविंद केजरीवाल हे ‘आप’ आनी काँग्रेस पक्षाक नेमक्यो कितल्यो सुवातो मेळटल्यो, हें सांगिनासतना भाजप ह्या वेळार खंयचेच परिस्थितींत 200 परस मुखार वच्चो ना अशें हड्डें बडोवन सांगतात.
समाजवादी पक्षाचे शहजादे अखिलेश यादव अासूं वा तृणमूलच्यो ममता दिदी हे लेगीत हाचे परस वेगळो राग आळयतना दिसून येनात. हें पळयले उपरांत भाजपान धक्को दिलोच जाल्यार हारीचें सगलें खापर ईव्हीएम यंत्रांचेर फोडपा खातीर विरोधक तयार जाल्ले आसुये असोय तर्क काडटात. इंडी आघाडीच्या ह्या फुडाऱ्यांनी केल्ले हे दावे कितले खरे वा फट थारतले हे कळपा खातीर आतां चड वेळ रावचें पडचें ना. मतदानाचो आनीक एकूच पांवडो आनी निकालाची 4 जून ही तारीख फक्त पांच ते स दिसांचेर येवन उबी रावल्या. मतदानाच्या सव्या पांवड्यार दिल्ली आनी पंजाबा सयत आठ राज्यांत मेळून शेनवारा 58 सुवातां खातीर मतदान जालें, आनी तातूंत दिल्लींतल्यो सात सुवातो जाल्यार सत्तारूढ भाजपाक जितल्यो म्हत्वाच्यो आसात तितल्योच आम आदमी आनी काँग्रेसी खातीरूय त्यो निर्णायक थारूंक शकतल्यो.
केंद्रांतल्या सरकाराचो मार्ग उत्तर प्रदेशांतल्यान वता अशें म्हणटात. पूण दिल्लींत जो पक्ष सातूय सुवातो जिखता तोच पक्ष वा आघाडी केंद्रांत सरकार स्थापन करता हें समिकरणूय तितलेंच रूढ जावन बाशिल्ल्यान दिल्लींत कितें घडटा हाचे कडेनूय देशाचें लक्ष लागून उरलां. ईव्हीएम यंत्रांत नेमकें कितें लिपलां हाचो उलगडो चार जून दिसा जावपाचो आसलो तरी भाजपाक सहजतायेन मुखार चाल दिवपाक राजकी अभ्यासक आसूं वा निरिक्षक हांची तयारी दिसना. प्रधानमंत्री नरेंद्र मोदी आनी भाजपाचे हेर ज्येश्ठ फुडारी मात राष्ट्रीय लोकशाय आघाडी ह्या वेळार चारशेचे मुखार धडक दितली हाचेर ठाम दिसतात.
देशभरांत पयल्या कांय पांवड्यार तुळेन उण्या प्रमाणांत मतदान जाल्ल्याचो फायदो आमकां जातलो असो दावो विरोधक एके वटेन करतात. जाल्यार विरोधक तांच्या मतदारांक मतदाना खातीर घरा भायर काडूंक शकूंक नाशिल्ल्यानूच मतदानाचो टक्को देंविल्ल्याचो युक्तिवाद भाजपाचे फुडारी करतात. पूण मतदान उणें जावप ही भाजपा खातीर हुस्क्याची गजाल आसा असो निकश काडपूय योग्य न्हय. दिल्लींत ह्या वेळार मतदानाची टक्केवारी 2019 चे तुळेन सुमारेक समान आशिल्ल्यान ह्या वेळारूय भाजपाक सातां मदल्यो सात सुवातो मेळटल्यो असो निश्कर्श काडप बरोबर न्हय. दिल्लींत आप आनी काँग्रेस हांचे मदीं जाल्ले अभद्र युती दिल्लीचो मतदार कितले मेरेन स्विकारतलो हो जसो लाखमोलाचो प्रस्न आसा, तसोच आम आदमी पक्ष आनी तांचे सर्वेसर्वा मुख्यमंत्री अरविंद केजरीवाल हांकां सोरो अबकारी घोटाळ्यांत जाल्ली अटक तशेंच तांच्योच खासदार स्वाती मालीवाल हांकां मुख्यमंत्र्याच्या निवासस्थांत स्वीय सचिवान केल्ली खर मारपेट हाचे कडेन दिल्लीचे मतदार कशे तरेन पळयतात हाचेरूय खूब कितें निंबून आसा.
मतदानाचो निमाणो पांवडो पुराय जाय मेरेन अरविंद केजरीवाल हांकां तिहार बंदखणींतल्यान मेळिल्लो 21 दिसांचो ब्रेकूय सोंपत आयिल्ल्यान तांकां परतून बंदखणींत हाजेरी लावची पडटली हाचे कडेनूय मतदारांनी तितलेंच गंभीरतायेन पळयिल्लें आसत. ताका लागून दिल्लींत भाजपूच जिखतलो असो एक अदमास आसा. आनी तशें जायत जाल्यार आप आनी काँग्रेसी मदले अभद्र युतीचोय अखेर जावंक शकता. नामनेचे कायदेपंडीत अभिषेक मनू सिंघवी हांकां स्वाती मालीवालाचो बळी दिवन राज्यसभेंत धाडपाचो रचिल्लो डाव केजरीवाल हांच्याच आंगार शेकलो आनी तातूंत आम आदमी पक्षाची लज चव्हाट्यार आयली.
दिल्लींत आम आदमी आनी काँग्रेस हे दोगूय खांद्याक खांदो लावन लडले जाल्यार पंजाबांत ह्या दोनूय पक्षांनी प्रतिस्पर्धी म्हणून एकामेकां कडेन लडटना आरोप प्रत्यारोपूय एकामेकांचेर केले, मागीर ह्या सोयीच्या आनी सुवार्थी राजकारणाचें भांडवल भाजपा कडल्यान करप सभाविकूच आशिल्लें. आतां दिल्लींत युती जाल्ली आसली तरी अरविंद केजरीवाल आनी राहूल गांधी एकदांय एके माचयेर आयले नात. हाचे वेल्यानूय ह्या दोनूय पक्षां मदीं सगलें कितें अलबेल आसा अशें म्हणपाचें धाडस कोण करतलो अशें दिसना. आतां पंजाबांतलें राजकारण हें देशाच्या राजकारणा परस वेगळें आसता हें वेळावेळार दिसून येत आशिल्ल्यान, थंयचे मतदार अानी आम आदमी पक्षाक ह्या वेळारूय हात दितले अशें सांगूंक येवचें ना. भारतीय जनता पक्ष सुमार अडेज ते तीन दसकां उपरांत पयलेच फावटी स्वबळार वेंचणुको लडयता. अशा वेळार पंजाबांत कितेंय जावंक शकता असो राजकी निरिक्षकांचो अदमास आसा.
पंजाब ह्या वेळारूय एक नवोच रस्तो स्विकारूंक शकता आनी तशें जायत जाल्यार आम आदमी खातीर तो आनीक एक धपको थारूंक शकता. काँग्रेस फुडारी राहूल गांधी आनी अरविंद केजरीवाल हांणी नरेंद्र मोदी आनी तांच्या भाजपा आड हल्लो चडोवपाची एकूय संद व्हगडावंक ना, हें खरें आसलें तरी मोदी मॅजिकूच मतदारां वेलो असर उणो करपाक तांकां कितलें मेरेन येस आयलें हो संशोधनाचो विशय आसा. आतां एकूच पांवडो उरिल्ल्यान मोदींची जादू अजून मुखार वतली काय ती हे वेंचणुकेंत सोंपतली, हें कळपाक आनीक चड वाट पळोवची पडची ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
