भांगरभूंय | प्रतिनिधी
पणजी: गोंयांत 1 जानेवारी ते 27 मे ह्या काळांत 333 झाडां पडून 47.8 लाख रुपयांच्या मालमत्तेचें लुकसाण जालें. ह्यो घडणुको पावस वा वादळी वाऱ्याक लागून घडिल्ल्यो. उजो पालोवपी दळा कडल्यान ही म्हायती मेळ्ळी. ह्या घडणुकां मजगतीं, कसलीच जिवीत हानी जाल्ली ना. ह्या काळांत दळाक 81.5 लाख रुपयांची मालमत्ता वाटावपाक येस आयलां.
उजो पालोवपी दळान दिल्ले म्हायती प्रमाण 333 पैकी सगल्यांत 155 घडणुको ह्यो रस्त्यार झाड पडपाच्यो आसात. उपरांत वीज वाहिन्या वा हेर विद्युत उपकरणांचेर झाडां पडपाच्यो 65 घडणुको घडल्यात. तशेंच फाटल्या पांच म्हयन्यांत घरांचेर झाडां पडपाचे 61, वाहनांचेर पडपाचेर 25, दुरगाचेर पडपाचे 16, तात्पुरत्या बांदकामाचेर पडपाचे 9 जाल्यार वेवसायीक बांदकामाचेर आनी धर्मीक थळांचेर पडपाची दरेकी एक घडणूक नोंद जाल्या.
म्हाल वार पळयत जाल्यार 1 जानेवारी ते 27 मे मजगतीं फोंडें म्हालांत सगल्यांत चड 57 झाडां पडपाच्या घडणुकांनी नोंद जाल्या. उपरांत दिवचले 49, तिसवाडे 44, बार्देसांत 41, सत्तरे 40, काणकोणां 24, पेडणें आनी साश्टी दरेकी 19, मुरगांवां 16, धारबांदोड्यां 14 जाल्यार केपें आनी सांगें म्हालांत झाडां पडपाच्यो दरेकी पांच घडणुको घडल्यात.
गोंयांत पावसाच्या दिसांनी झाडां पडपाच्यो घडणुको घडटात. हाका लागून फाटल्या कांय वर्सांत जिवीतहानी जाल्ल्याचीं उदाहरणां आसात. अशी जीर्ण जाल्लीं झाडां, तांच्यो खांदयो मारपा खातीर सरकारान 25 हजार ते 1 लाख रुपया निधी जाहीर केला. सोमारा जाल्ले राज्य आपत्कालीन वेवस्थापन समितीचे बसकेंत मॉन्सुना पयलींचे तयारीचो नियाळ घेतलो. ह्या वेळार लेगीत राज्यांतल्या घातक झाडां विशीं सुचोवणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
