भांगरभूंय | प्रतिनिधी
पणजी : दृश्टी मरीन ह्या जीव रक्षक संस्थेन दर्यादेगांचेर फाटल्या 3 दिसांत 4 जाणांक वाटायल्यात. तशेंच शेणिल्ल्या 4 भुरग्यांक तांच्या पालकां मेरेन पावयले, अशी म्हायती दृश्टी कडल्यान मेळ्ळ्या.
शेनवारा पॅरासेलींग करपी 11 वर्सांचो भुरगो आनी ताचो पॅरासेलींग प्रशिक्षक वादळांत आडकले. वादळाक लागून तांची बोट दर्यादेगेर उदकांत आडकली. तशेंच बोटी वयलो पॅराग्लायडींक संच तुटिल्ल्यान ते वाऱ्याचेर हुंबकळटाले. जीव रक्षकांक ही गजाल कळटकच तांणी उदका खेळ ऑपरेटर आनी थळाव्यांक बरोबर घेवन तांकां मजत केली आनी संकश्टांतल्यान सोडयले.
कळंगूट दर्यादेगेर एका तिशेक वर्सांच्या तरणाट्याक वाटावपाक येस आयलें दर्या खवदळिल्लो आसतना तो सांगून लेगीत दर्यांत खूब मुखार गेलो. परतून येवपाक ताका जमना जाले उपरांत 7 जीव रक्षकांनी ताका भायर काडलो. मस्ती केली म्हूण ताका पुलिशे कडेन दिलो.
तशेंच मोरजें रिव्हर पॉयंटार कर्नाटकांतली एक 30 वर्सां पिरायेची बायल दर्यांत रीप करंट घेऱ्यांत आडकली. तिका जीव रक्षक विकास चव्हाण आनी दत्ताराम चव्हाण हांणी रेस्क्यू बोर्ड आनी ट्युबाच्या आदारान भायर काडली.
आयतारा हणजूण दर्यादेगेर एका 25 वर्सांच्या थळाव्याक जीव रक्षक आनंद परब हाणें रेस्क्यू बोर्डाच्या आदारान वाटायलो. तोवूय रीप करंटांत आडकल्लो.
कळंगूट दर्यादेगेर शेणिल्ल्या भुरग्यांचो सोद घेवन पालकां कडेन तांकां दिवपाच्यो 3 घडणुको घडल्यो. अंदू दर्यादेगांचेर शेणिल्ल्या भुरग्यांक सोदून तांकां पालकां कडेन परत दिवपाच्यो 62 घडणुको घडल्यात.
बागा दर्यादेगेर दोन वेगळ्यावेगळ्या घडणुकांनी दोगांक जीव रक्षकांनी उपचार दिले. पेंवताना फुटिल्ले बाटलेची कंवची लागून सोलापूरचो 35 वर्सांचो एकलो जखमी जालो. जाल्यार कर्नाटकांतल्या एका 19 वर्सां पिराये चलयेक पेंवताना नाकाक मार लागलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
