भांगरभूंय | प्रतिनिधी
सचीन दळवी
गोंयांत आयोजीत केल्ले 37वे राष्ट्रीय खेळां सर्ती खातीर पणजीच्या कांपाल मैदानाचेर बेसबॉल मैदान बांदपाचें आशिल्लें. पूण, सर्त सुरू जावपाक कांय दीस बाकी आसतना बेसबॉल खेळ वगळायिल्ल्यान बेसबॉल सर्त जावंक ना आनी कांपाल मैदानाचेर बेसबॉल मैदान केन्नाच उबें जालें ना. म्हायतीच्या अधिकाराखाला मेळिल्ल्या म्हायती प्रमाण केन्नाच पुर्ण जावंक नाशिल्ल्या ह्या मैदाना खातीर वट्ट 2 कोटी 68 लाख 87 हजार 603 रुपया खर्च आयला.
राष्ट्रीय खेळां सर्ती खातीर उबारपाक आशिल्ल्या ह्या मैदानाचे उदरगती खातीर कंत्राटदाराक 2 कोटी 61 लाख 92 हजार 663 रुपया दिल्या. हाचे खेरीत कन्सल्टन्सी सर्व्हिसे खातीर 6 लाख 94 हजार 940 रुपया मेजल्यात. हातूंतले 3,91,386 कोटी दिल्यात, ही म्हायती खेळां मंत्री गोविंद गावडे हांणी विधानसभेंत विचारिल्ल्या प्रस्नाक जाप दितना दिल्ली.
विधानसभेंत 20 जुलय 2023 दिसा खेळां मंत्री गोविंद गावडे हांकां लेखी प्रस्नांत राष्ट्रीय केळां सर्तींतल्या मुळाव्या सुविधां विशीं म्हायती विचारिल्ली. ताका जाप दितना मंत्री गावडे हांणी सांगिल्लें, पणजीच्या कांपाल मैदानाचेर बेसबॉलच्या मैदानाचे उदरगती खातीर 2 कोटी 61 लाख 92 हजार 663 रुपया दिल्या आनी शिल्लक देय शुन्य आसा. पूण, इतको पयसो खर्च करून लेगीत कांपालाचेर बेसबॉल मैदान पुर्ण जावंक ना.
बेसबॉल पंगडाक सरकाराची अर्थीक मजत
गोवा बेसबॉल असोसिएशनाक राज्य सरकारा कडल्यान अर्थीक मजत मेळत आसता. पूण, म्हायतीच्या अधिकारातल्यान मेळिल्ले म्हायती प्रमाण 2022-23 आनी 2023-24 वर्सा अर्थीक मजत कांय कारणाक लागून मेळूंक ना. 2021-22त सरकारा कडल्यान बेसबॉल असोसिएशनाक 1 लाख 90 हजार रुपया अर्थीक स्वरुपांत मेळिल्ली.
सुजज्ज आसतलें आशिल्लें बेसबॉल मैदान
राष्ट्रीय खेळां सर्ती खातीर बांदपाक आशिल्लें बेसबॉल मैदान सगल्या सुविधांनी सुसज्ज आसतलें आशिल्लें. ह्या मैदानांत प्रेक्षकांक बसपाची वेवस्था आसतली आशिल्ली. हाचे खेरीत मैदानाचेर डिजीटल स्कोरबोर्ड लेगीत लागतलो आशिल्लो. तशेंच खेळ जावपी मुखेल मैदान जबरदस्त बांदपाचें आशिल्लें. पूण, अखेर मेरेन हें मैदान पुर्ण जावंक ना.
गोंयच्या बेसबॉल पंगडांक मैदानूच ना
गोंयचे चले आनी चलयांचे बेसबॉल पंगड आसात. पूण, ह्या पंगडां खातीर स्वताचें अशें बेसबॉल मैदान ना. बेसबॉल सर्तींत गोंयान सदांच राष्ट्रीय पांवड्याचेर उत्कृश्ट प्रदर्शन करून गोंयाक साबार पदकां जिखून दिल्यात. पूण, मैदानाचे दिश्टीन पळयलें जाल्यार गोंयच्या बेसबॉल पंगडा कडेन मैदान ना. कांपाल मैदानाचेर तात्पुरतें मैदान बांदून आनी ताचेर पयसो खर्च करून खेळगड्यांच्या पदरांत अखेरेक निर्शेणीच आयली आनी मैदान लेगीत बांदून जावंक ना.
खेळां मंत्री गोविंद गावडे हांणी लक्ष दिवपाची गरज
राष्ट्रीय खेळां सर्त सोंपल्या उपरांत खेळां मंत्री गोविंद गावडे हांणी गोंय आतां व्हड सर्ती खातीर तयार जाला अशें म्हणिल्लें. तशेंच गोंयांत आतां खेळां संस्कृती तयार जातली अशें लेगीत म्हणिल्लें पूण, एखाद्रा मैदानाचेर अशे तरेन खर्च जाता आनी मैदान लेगीत उबें जायना जाल्यार खेळगड्यांनी खंय सराव करचो असो प्रस्न गोंयच्या बेसबॉल खेळगड्यांनी विचारला.
बेसबॉल खेळगडे वाट पळयता मैदानाची
कांय बेसबॉल खेळगड्यांनी कांपाल मैदानाचेर बेसबॉल बांदपाच्या निर्णयाचेर निर्शेणी उक्तायिल्ली. गोंयच्या पंगडांतल्या एका खेळगड्यान सांगलें, तांकां बांबोळी वा हेर सुवातेर तात्पुरतें मैदान उबारून बेसबॉल सराव करचो पडटा. जर हें मैदान कांपाला बदला दुसरे सुवातेर बांदिल्लें तर ह्या मैदानाचो कायम स्वरुपी वापर गोंयच्या पंगडाक करपाक मेळटलो आशिल्लो आनी गोंयचो पंगड राष्ट्रीय पांवड्यार आनीक बरें प्रदर्शन करपाक शकतलो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
