भांगरभूंय | प्रतिनिधी
मुख्यमंत्रीः नव्यान इंग्लीश मुळाव्या शाळांक मान्यताय ना
भांगरभूंय । प्रतिनिधी
पणजी : जर एकादे संस्थेन कोंकणी शाळेक मान्यताय घेवन इंग्लीश मुळावी शाळा सुरू केली जाल्यार खर कारवाय जातली, अशी शिटकावणी मुख्यमंत्री डॉ. प्रमोद सावंत हांणी दिल्या. आतां नव्यान इंग्लीश मुळाव्या शाळांक मान्यताय मेळची ना, अशें तांणी स्पश्ट केलें.
आपत्ती वेवस्थापनाची बसका घेतले उपरांत मुख्यमंत्र्यांनी पत्रकार परिशद घेतली. ह्या वेळार उलयताना तांणी ही म्हायती दिली.
गोंयांत इंग्लीश मुळाव्यो शाळा सुरू करपाचे यत्न चालू आसात. मुळाव्या इंग्लीश शाळांक विरोध आशिल्ल्याचें पत्र कोंकणी भाशा मंडळान मुख्यमंत्री डॉ. सावंत हांकां बरयलां. हे फांटभुयेर उलयतना मुख्यमंत्र्यान ही म्हायती दिली.
मराठी वा कोंकणी शाळांक मान्यताय घेवन इंग्लिशीचे वर्ग सुरू करपाची भिरांत कांय संस्थांनी उक्तायल्या. हे प्रकार सरकार सोंसून घेवचें ना. कोंकणी वा मराठी शाळांक मान्यताय घेवन इंग्लीश माध्यमाचे वर्ग सुरू जाले जाल्यार संबंदीत संस्थेचेर खर कारवाय जातली, अशी शिटकावणी मुख्यमंत्री डॉ. सावंत हांणी दिल्या. मुळावें शिक्षण हें आवयभाशेंतल्यान आसपाक जाय, असो सिद्धांत आसा. तशेंच कांय वर्सां आदीं माधव कामत समिती आनी भास्कर नायक समितीन आवयभाशेंतल्यान मुळावे शिक्षण आसपाक जाय, असो अहवाल सादर केल्लो. हाचे उपरांत तेन्नाचे मुख्यमंत्री सर्गेस्त मनोहर पर्रीकार हांणी हे फुडें इंग्लीश मुळाव्या शाळांक मान्यताय दिवप ना, असो निर्णय 2014 वर्सा घेतिल्लो. ते प्रमाण आनीक इंग्लीश मुळाव्या शाळांक मान्यताय मेळची ना, अशें मुख्यमंत्री डॉ. सावंत हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
