भांगरभूंय | प्रतिनिधी
पणजी : हवामान खात्यान फुडल्या पांच दिसांनी म्हळ्यार ३१ मे मेरेन मान्सून केरळांत पावपा खातीर वातावरण अनुकूल आशिल्ल्याचो अदमास उक्तायला. मान्सूनाक केरळांतल्यान गोंयांत दाखल जावपाक सुमार ४ ते ५ दिसांचो काळ लागता. हाका लागून राज्यांत मान्सून ४ ते ५ जुनाक पावपाची शक्यताय आसा. फाटल्या वर्सा राज्यांत ११ जुनाक मान्सून आयिल्लो.
हवामान खात्यान राज्यांत २ जून मेरेन आडवेळो ते मध्यम स्वरूपाच्या पावसाची शक्यताय उक्तायल्या. दमट वातावरण जरी आसलें तरी राज्यांतलो तापमानाचो पारो चडिल्लोच आसा. सोमारा पणजे चडांत चड ३४.३ अंश सेल्सिअस तापमानाची नोंद जाली. जाल्यार मुरगांवां चडांत चड तापमान ३३.८ अंश सेल्सिअस उरलें. राज्यांत २ जून मेरेन चडांत चड तापमान ३४ अंश जाल्यार उण्यांत उणें तापमान २८ ते २९ अंश सेल्सिअस उरपाची शक्यताय आसा.
१ मार्च ते २७ मे मजगतीं राज्यांत सरासरी ११९ मिलिमीटर पावसाची नोंद जाल्या. हे मजगतीं राज्यांत सुमार ४८.८ मिमी पावसाची नोंद जाता. अंदूंचो मान्सुना आदलो पाव १४३.६ टक्क्यांनी चड आसा. ह्या काळांत राज्यांत फोंड्यां सगळ्यांत चड २८५.४ मिमी पावसाची नोंद जाल्या. उपरांत एला, पोरणें गोंय १९७ मिमी जाल्यार पणजे १६९.६ मिमी पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
