भांगरभूंय | प्रतिनिधी
मडगांव, प्रतिनिधी ः राज्यांतल्या चिरें खणींनी तरणाट्यांक बुडून मरण येता. फावो त्या वेळार प्रतिबंधात्मक उपाय करपाक सरकाराक अपेस आयलां. राज्य बाल हक्क संरक्षण आयोगाच्या जुलय 2023 वर्साच्या निर्देशा प्रमाण दोनूय जिल्लोधिकाऱ्यांच्या कारवायेचो अहवाल सरकारान उक्तो करचो अशी मागणी विरोधी फुडारी युरी आलेमांव हांणी केल्या.
फाटल्या कांय म्हयन्यांत चिरें खणींनी, कानालांत, घसघशें आनी दर्यांत बुडून जायत्या जाणांक मरण आयलां. अशा घडणुकांचेर नियंत्रण दवरपा खातीर उपाय करपाची गरज आसा. हे खातीर तयार केल्ले समितीचो अहवाल सरकारान जाहीर करचो अशी मागणी आलेमांव हांणी केल्या.
गोंयांत फाटल्या कांय वर्सांत चिरें खण, कानलांत आनी घसघश्यांनी बुडून सुमार 35 जाणांक मरण आयलां. हातूंत 2019 वर्सा तुयेंतल्या फातराच्या खणींत 4 भुरग्यांक मरण आयलें. सांगें, कुर्पेंच्या खाण खड्ड्यांत 24 वर्सां पिरायेच्या तरणाट्याक मरण आयलें, कांसावले विद्यार्थ्यांक बुडून मरण आयलें, रेवोड्या 21 वर्सां पिरायेच्या तरणाट्याक बुडून मरण आयलें, भटवाडी नानोड्यां चिऱ्या खणींत न्हावपाक गेल्ल्या 17 वर्सा पिरायेच्या तरणाट्याक बुडून मरण आयलें जाल्यार उसप – नानोड्यां कानालांत अजून एका 16 वर्सा पिरायेच्या तरणाट्याक बुडून मरण आयलें हें खूब दुख्खदायक आसा अशें आलेमांव हांणी म्हणलें.
खण खात्यान 30 जून 2023 दिसा बुडून मरण येवपी घडणुकांचेर नियंत्रण दवरपाच्या हेतान गोंयांतल्या खण वाठारांचेर नदर दवरपाक आनी तपासपा खातीर एक समिती स्थापन केल्ली. कांसावलींतल्या बंद खण खंदकांत बुडून विद्यार्थ्याक मरण आयिल्ल्यान गोंय राज्य बाल हक्क संरक्षण आयोगान स्वेच्छा दखल घेतिल्ली. आयोगान दोनूय जिल्होधिकाऱ्यांक सगल्या खणींचें सर्वेक्षण करपाक सांगिल्लें. फुडाराक मरण येवचें न्हय म्हणून दोनूय जिल्होधिकाऱ्यांक कुंपन बांदून खणींनी प्रवेशाचेर मर्यादा घालपाची सुचोवणी दिल्ली. ताचोच अहवाल सरकारान जाहीर करचो अशी मागणी युरी आलेमांव हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
