भांगरभूंय | प्रतिनिधी
दिवचल : उसप- नानोड्यां तिळारी कानालांत काल (२६) बुडिल्ल्या दीप बागकार (१७, रा. दाडाची वाडी, धारगळ) ह्या तरणाट्याची कूड आयज सकाळीं सांपडली. उजो पालोवपी दळाच्या जवानांनी ती भायर काडून पोस्टमार्टेमा खातीर धाडल्या.
हे विशीं चड म्हायती प्रमाण, नानोड्यांच्या एका फार्माचेर चार ते पांच जाणांच्या तरणाट्याचो एक गट आयिल्लो. ताचे वयले वटेन तिळारीचो कानाल आसा. त्या कानालाच्या प्रवाहाक बरोच नेट आसता. हे सगळे इश्ट थंय गेले तेन्ना दीप हाणें कानालांत बडी घालून उदकाचो अंदाज घेवपाचो यत्न केलो. मात अचकीत तो उदकाच्या प्रवाहांत व्हांवून गेलो. सुमार १०० मिटर मेरेन ताच्या इश्टांनी ताचो फाटलाव करपाचो यत्न केलो. मात तो व्हांवत सरळ मुखार पावलो.
उपरांत दिवचल पुलीस आनी उजो पालोवपी दळान घडणुके सुवातेर वचून ताचो सोद घेतलो. बोट आनी सामान घेवन साडे तीन किलोमिटराच्या अंतरा मेरेन रातचो ताचो सोद घेतलो. मात ताचो पत्तो लागूंक ना. आयज सकाळीं ताची कूड कानालांत सांपडली. उपरांत उजो पालोवपी दळाच्या जवानांनी ताची कूड भायर काडली आनी पोस्टमार्टमा खातीर धाडून दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
