भांगरभूंय | प्रतिनिधी
फोंडें, प्रतिनिधी ः कुंडयच्यान बांदकाम सेंटरिंगा खातीर वापरपी 411 पत्र्याच्यो प्लेटी चोरपाचे प्रकरणांत शशिकांत महादेव गावडे (22, रा. फणसवाडी- नावेले) हाका म्हाड्डोळ पुलिसांनी आयतारा रातीं अटक केली. आयतारा सांजवेळार कंत्राटदार सेविंदर कोहली हांणी पुलिशेंत रितसर कागाळ दाखल केल्ली. प्लेटी चोरपा खातीर वापरिल्ली मोटार पुलिसांनी जप्त केल्या.
कंत्राटदारान कुंडय बांदकामाच्या कामा खातीर भाड्याच्यो प्लेटी दवरिल्यो. 5 मे दिसा एका गाडयेंत ह्यो प्लेटी घालतना कंत्राटदारान पळयले. पूण मोटार ड्रायव्हरान थंयच्यान पळ काडलो. कंत्राटदाराक कामा निमतान सावंतवाडी वच्चें पडलें म्हणून त्या वेळार कागाळ दाखल केली ना. आयतारा सांजवेळार परत आयले उपरांत कंत्राटदारान पुलिशेंत कागाळ दाखल केली. उपरांत पुलिसांनी दुबाविताक अटक केली. तशेंच प्लेटी चोरपाच्या प्रकरणांत वापरिल्ली मोटार क्रमांक जीए-05डी-2220 जप्त केल्या. म्हाड्डोळ पुलीस निरिक्षक योगेश सावंत हांच्या मार्गदर्शना खाला उपनिरिक्षक सुशांत सांगोडकार आनी हवालदार सूरज गावडे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
