भांगरभूंय | प्रतिनिधी
कोलकाता, खबरां संस्था ः अस्तंत बंगाल आनी बांगलादेशांतल्या दर्यादेगेवेल्या वाठारांनी आयतारा रातीं रेमल चक्रीवादळ दाखल जाले. ह्या वादळाची तीव्रता वराक 110 ते 120 किलोमीटर अशी आशिल्ली अशें हवामान विभागान सांगलां. सांजवेळा 8:30 वरांचेर बंगाल दर्यादेगे वयल्यान सुमार 30 किमी अंतराचेर दाखल जाल्ल्या ‘रेमल’ चक्रीवादळाचो परिणाम सुमार चार वरां मेरेन चालू उरतलो अशें हवामान खात्यान सांगलां.
अस्तंत बंगाल आनी बांगलादेशाच्या दर्यादेगेर तशेंच बंगालच्या उपदर्यांत वादळी वाऱ्याचो नेट वराक 110 ते 120 किमी आशिल्लो. ते उपरांत हें वारे वराक 135 किमी. गतीन चालू आशिल्ले. स वरां उपरांत ताची तीव्रता उणी जातली अशें हवामान खात्यान सांगलां. मजगतीं, प्रधानमंत्री नरेंद्र मोदी हांणी आयतारा बसका घेवन तयारेचो नियाळ घेतलो. केंद्रीय गृह विभागाकूय परिस्थितीचेर नदर दवरची अशें सांगलें.
एक लाखां परस चड नागरिकांचें स्थलांतर
अस्तंत बंगाल सरकारान दर्यादेगेवेल्या वाठारांतल्या तशेंच सागर जुंवो आनी सुंदर बनांतल्यान एक लाखां परस चड नागरिकांचे सुरक्षीत सुवातींनी स्थलांतर केले. राज्य आपत्ती वेवस्थापन आनी राष्ट्रीय आपत्ती प्रतिसाद दळाचे दरेकीं 16 युनिट दर्यादेगेवेल्या वाठारांनी तैनात केल्यात अशें अधिकाऱ्यांनी सांगलें. तशेंच तांचे खातीर थंय हेर सुविधा उपलब्ध केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
